دارایی کوردستان دووپاتکرد لە پابەندبوین کلکردن لیست مووچەیل و دابینکردنی پشت وە بڕیاریگ لە بەغداوە بەسێد
شەفەق نیوز - هەولێر
وەزارەت دارایی و ئابووری لە هەرێم کوردستان، ئمڕوو سێشەممە، دووپاتکرد لە پابەندبوین گشتی خوەی وە کلکردن لیست مووچەیل فەرمانبەرەیل و تەرازووی وەپیاچگن ئەرا وەزارەت دارایی فیدراڵی وە مەبەست دابینکردنی، و لە هەمان وەخت دیاریکرد ئەرا بڕیار کلکردن مووچەیل پاشەکەوتکریاگ ئەرا قەرزەیل فەرمی لە ئەستۆ حکومەت هەرێمە.
قسەکەر وەناو وەزارەتەگە، هونەر جەمال، لە کۆنگرەیگ رووژنامەوانی کە لە هەولێر ساز کریا و ئاژانس شەفەق نیوز وەدویاچگنی کرد، وت: "وەزارەتەگە پابەندە وە جیوەجییکردن ئەرکەیل کەفێدە بانی لە کلکردن لیست فەرمانبەرەیل و تەرازووی وەپیاچگن مانگانە وە هەمیشەیی جویر مانگەیل گوزەشتە"، و ئاشکرا کرد "رێکارەیل دابینکردن مووچەیل و دیاریکردن وەخت کلکردنی بەسیاگە وە وەزارەت دارایی فیدراڵی، و لە لای ئیمەوە هویچ گیچەڵیگ نییە کە وەرپەرچ بەشەوکردنەگە بدەێد".
لە وەڵام پرسیاریگ پەیوەنیدار وە دۆسیەی مووچەیل پاشەکەوتکریاگ لە ساڵەیل گوزەشتە، جەمال ئاشکرا کرد کە "وە دەستپێشخەرییگ لە وەزارەت دارایی، ئەنجومەن وەزیران هەرێم کوردستان بڕیار دایە وە گلەوداین مووچەیل پاشەکەوتکریاگ جویر قەرز لە ئەستۆی حکومەت ئەرا پارێزگاریکردن لە مافەیل فەرمانبەەیل و پابەنبوین وە گلەودانیان لە ئایندە".
