خەسەخانەیگ لە هەولێر شمارەی گەپیگ لە قوربانیەیل رویداوەیل هاتوچو توومار کەێد

شەفەق نیوز/ خەسەخانەی فریاکەفتن خوەرئاوای هەولێر، ئمڕوو دووشەممە،  توومارکردن نزیکەی ٢٠٠٠ رویداو هاتوچو راگەیان، ئەوەیش وەماوەی ئی پەنج مانگ دویا.

ئیدارەی خەسەخانەگە لە  بەیاننامەیگ رەسیە ئاژانس شەفەق نیوز وت: ١٧٤٥ رویداو هاتوچو توومار کردیە، بوینەسە هوکار کوشیان ٦١ کەس، وەگەرد شمارەی گەورەیگ لەو زەخمدارەیلە ک بەشیگیان تویش کەلەمەی هەمیشەیی هاتنە.

وتیش: ئی شمارەیلە تەنیا لە یەک خەسەخانە توومار کریانە، و تەنیا لە سەرەتای مانگ ئایار تا مانگ ئەیلوولە، و دیاری کرد ک بەرزترین شمارەی رویداوەیل لە مانگ ئاب بویە، ک رەسیە ٣٩٦ رویداو، و کەمتریان لە مانگ ئایار بویە وە ٣١٥ رویداو.