حکومەت هەرێم کوردستان هويردەکاری ڕێککەفتنەيل وزە وەرد واشنتۆن ئاشکرا کەێد: وەبی هەماهەنگی وەرد بەغدا

شەفەق نیوز/ کەمال محەمەد وەزیر سامانە سروشتییەیل وە وەکالەت لە حکومەت هەرێم کوردستان، ئمڕوو دووشەممە 2017/11/2016، راگەیان کە سەردانەگەی ئیسەی شاند حکومەت هەرێم ئەرا واشنتۆن ئامانج پتەوکردن پەیوەندییە سیاسی و ئابووری و سەربازییەیلە وەرد ئەمەریکا، یەیش بیجگە لە فراوانکردن هاوکاری وەرد کۆمپانیا ئەمریکییەیل کە لە کەرت وزە کار کەن.

لە کۆنگرەیگ رووژنامەوانی کە لە واشنتۆن پایتەخت وەڕیەو چگ، و ئاژانس شەفەق نیوز چەودیاریی کرد، وەزیر ئاشکرا کرد کە شاندەگە لە سەردانەگە دوو رێککەفتن گرنگ لە کەرت غاز و نەفت واژووکرد. دیاری کرد کە رێککەفتن یەکەم پەیوەندی وە وەکارهاوردن کێڵگە غازییەیلەو دیرێد لە هەرێم ئەرا بەرهەمهاوردن کارەبا ئەرا کوردستان و ئەو ناوچەیلە کە کارەبا وەپییان دریەێد لە چوارچیوەی عراقر و رێکەفتن دویەم تایبەتە وە دراوردن نەغت و غاز لە کێڵگەیل هەرێم وە هاوکاری وەرد کۆمپانیایل ترەک ئەمریکی.

کەمال محەمەد دووپات کرد کە ئەو گریەبەسەیلە واژوو کریانە رێککەفتن هاوبەشیین، جویر ئەوەگ لە گوزەشتە بویە، وتیش "هویچ هەماهەنگییگ وەرد حکومەت فیدراڵی لە بەغدا لەبان ئەو رێککەفتنەیلە نەویە". بەڵام دووپاتیش کرد کە "رێککەفتنەیل دەسمیەتی  لە قایمکردن ژیرخانی عراق دەن، وەتایبەتی رێککەفتن غاز".

وتیش: رێککەفتن غاز دەسمیەتی دەێد لە چارەسەرکردن کێشەی کارەبای هەرێم، پاڵپشتی گەشەسەنین پیشەسازی، و ری سازێد ئەرا وەکارهاوردن غاز لە بانان ئەرا ناوخۆ.

وەزیرەگە لە کۆتایی وتیش: ئیرنگە حکومەت هەرێم کارد کەێد ئەرا فراوانکردن پەیوەندییەیلی وەرد لایەنە ناودەوڵەتییە جیاوازەیل، وتیش: "ئەمریکا هاوپەیمانیگ ستراتیژی هەرێمە، و چەن کۆمپانیایگ ئەمریکی هەن کە لە کوردستان کار کەن".

لە سەردانە فەرمییەگە ئەرا واشنتۆن، مەسرور بارزانی، سەرۆکوەزیرەیل هەرێم کوردستان، سەرپەرشتی واژووکردن دوو رێککەفتن گرنگ وزە وەرد کۆمپانیایل نەفت ئەمریکی HKN Energy و Western Zagros لە ژوور بازرگانی ئەمریکا کرد. 

ئەو دوو رێککەفتنە، وەقسەی حکومەت هەرێم، بەهای دەیان ملیار دۆلارە و ئامانجیان پەرەپیدان کەرت نەفت و وزە و قایمکردن ژیرخان ئابووریی هەرێمە.