حکومەت هەرێم ۱۰ زیندانی دەێدە دەس ئیران

شەفەق نیوز/  حکومەت هەرێم کوردستان، ۱۰ زیندانی داگە دەس دەسڵاتدارەیل ئیران، وەگورەی ئەوەگ وەزارەت کاروبار کۆمەڵایەتی، ئمڕوو سیشممە، راگەیانیە. 

لە خاڵ هاتوچو سنوور حاجی عومران مەراسیم ئیمزاکردن یاداشتنامەی چوارەم ئەنجامدریا ئەرا ئاڵشتکردن زیندانیەسل ناوبەین هەردوگلا.   

یاداشتەگە لەناوبەین نۊنەرەیل وەزارەت کار و کاروبار کۆمەڵایەتی هەرێم و نۊنەرەیل وەزارەت داد ئیران ئیمزا کریا و دۊیاجار تۆمەتبارەیل رادەست کریان ئەرا وڵاتەگەیان. 

وەڕێەوبەر گشتی وەڕێەوبەرایەتی چاکسازی کۆمەڵایەتی لە هەرێم ئەحمەد نەجمەدین لە وتار کولیگ لەباوەت ئیمزاکردن یاداشتەگە وت، ئاڵشتکردن زیندانیەل لە مابەین حکومەت هەرێم کوردستان و ئیران وەپای رێککەفتن ناوبەین عراق و ئیرانە وەگورەی یاسای شمارە ٦ لە لایەن ئەنجومەن نۊنەرەیل عراقی ساڵ ۲۰۱٤ دەرچگە.