حزبیگ کورد ئۆپۆزسیۆن پەنج کوشیان ودەیان زەخمدار وە گورز ئیران وەبان بارەگەیلی لە هەرێم کوردستان راگەینێد
شەفەق نیوز/ پارت ئازادی کوردستان ئۆپۆزسیۆن ئیرانی، ئمڕوو چوارشەممە، راگەیان ک ئەو گورز ئیرانیە لەبان بارەگایلیان لە قەزای کۆیە لە پارێزگای هەولێر، بویە هووکار کوشیان پەنج کەسیان لەلای کەمەو، و دەیان زەخمداری.
ئەردەڵان خسرەوی قسەکەر حزبەگە لە وتاریگ ئەرا ئاژانس شەفەق نیوز وت: تا ئیسە پەنج کوشیاگ و ٥٠ زەخمدار دیریمن.
لەلای خوەییش، شێروان جەلال وەڕیەوبەر تەندروسی قەزای کۆیە وت: تا ئیسە خەسەخانەی گشتی قەزاگە دوو کوشیاگ و ١٢ زەخمدار لەو گورزە وەرگردیە.
سامان بەرزنجی وەزیر تەندروسی هەرێم کوردستان، شمارەی گەورەیگ لە ماشینەیل فریاکەفتن ئەرا قەزای کۆیە کل کرد، و ئۆمێد خۆشناو پاریزگار هەولێر فەرمان وە ئامادەباشی گشت ریخریاگەیل تەندروسی ئەرا فریاکەفتن زەخمدارەیل دا.
وەزیر تەندروسی لە وتاریگ تایبەت وە ئاژانس شەفەق نیوز وت: شمارەی قوربانیەیل گورز ئیران لەبان کۆیە رەسیە سێیان، و ١٦ زەخمدار، و دیاری کرد ک دووان لە قوربانیەیل لەناو خەسەخانەی قەزاگە گیانیان لەدەسدانە، و چوارەمەگە لە شار هەولێر.
