"جەژن جەما".. نەینەوا دەوام ئەرا ئێزیدییەیل 7 رووژ پەک خەێد
شەفەق نیوز- نەینەوا
پارێزگار نەینەوا عەبدولقادر دەخیل، ئمڕوو دووشەممە، رێنمایی دا وە پەکخستن دەوام فەرمی ئەرا رووڵەیل پێکهاتەی ئێزیدی لە گشت فەرمانگە و دامەزراوە حکومییەیل سەر وە پارێزگاگە ئەرا ماوەی هەفت رووژ، هاودەم وەرد ئاهەنگەیل جەژن جەما.
دەخیل لە پۆستیگ لەڕی پەڕەی تایبەت خوەی لە فەیسبووک، کە ئاژانس شەفەق نیوز وەدۊای کەفت، وت کە بڕیار دريا پشوویگ فەرمی بیریەێد وە گشت فەرمانبەر و کارمەنەیل لە رووڵەیل ئایین ئێزیدی لە گشت فەرمانگە و دامەزراوە حکومییەیل لەناو پارێزگای نەینەوا، ئەرا ماوەی هەفت رووژ یەک لەدۊای یەک، کە لە رووژ سێشەممە 6 تشرین یەکەم/ ئۆکتۆبەر ئیسە دەس وەپی کەێد، و تا 13 لەلی وەردەوام بوود.
پارێزگار نەینەوا پیرووزبایی پیشکەش وە روزڵەیل پێکهاتەی ئێزیدی کرد وە بزونەی جەژن جەما، وە ئومید ئەوەگ گشت رووڵەیل گەل عراقی رووژەیلیگ بوون کە ئاشتی و ئارامی لەناوی زاڵ بوود.
وتیش کە پشووگە تیەێد ئەرا ریخوەشکردن وەرانوەر رووڵەیل ئایین ئێزیدی ئەرا جیوەجیکردن نەریتەیل و رێوڕەسمە ئایینییەیلیان و ئاهەنگگردن وە جەژنەیلیان، لە چوارچیوەی وەیەکەوژیان کۆمەڵایەتی هاوبەش.
ئێزیدییەیل لە عراق و جەهان ئاهەنگ وە رێوڕەسم حەج ئێزیدی کەن کە ناسریاگە وە جەژن جەماعەت "جەمای شێخادی"، کە ئەرا ماوەی 7 رووژ وەردەوام بوود وە نەریتەیل ئایینی جیاواز لەناو پەرستگای لالش پیرووز.
