جاریگتر قەیران بەشەوکردن مووچە لە سلێمانی سەردەکەێد
![جاریگتر قەیران بەشەوکردن مووچە لە سلێمانی سەردەکەێد](https://media.shafaq.com/media/arcella/1657020120918.jpg)
شەفەق نیوز/ پارێزگای سلێمانی، ئمڕوو سێشەممە، گلەوخواردن قەیران بەشەوکردن مووچە وەخوەی دی، لە وەختیگ فەرمانبەر وخانەنشینەیلیگ دووپات کردن ک نەتوەنستنە مووچەیل مانگ گوزەشتە وەربگرن.
یەکیگ لە خانەنشینەیل ک نەخوازی ناوی ئاشکرا بوود ئەرا ئاژانس شەفەق نیوز وت: فرە لە خانەنشینەیل شەوەکی زوی چینەسە بانکەیل سلێمانی تا مووچەیلیان وەربگرن، باوجی وەبی هویچیگ گلەو خواردن، وە دەسپیچگ ئەوە ک بانکەگە پویل نەیرێد.
لەلای خوەییش، حسێن عەلی ک فەرمانبەرە لە وەزارەت روشنهۊری و هونەری لە گەرمیان ئەرا ئاژانس شەفەق نیوز وت: بڕیار بوی ئمڕوو مووچەی مانگ حوزەیران بیەن، باوجی تا ئیسە پویل ئەرا بانک شێروانە لە کەلار نەهاتیە تا بیەنەی فەرمانبەرەیل.
وەگورەی لیست وەزارەت دارایی و ئابووری لە حکومەت هەرێم کوردستان، بڕیار بوی ئمڕوو مووچەی خانەنشینەیل مەدەنی و وەزارەت ئاوەدانکردن و نیشتەجیکردن و روشنهۊری و گەنجەیل وکارەبا بەشەو بکریەێد.