تورکیا چەمیگ لە کوردستان هشکەو کەێد ونیەیلێد عراقیەیل ئەرای بڕەسن
شەفەق نیوز/ ئاست ئاو چەم حیزب هیزل، ک یەکیگە لە سەرچەوەیل چەم دیجلە لە پارێزگای دهۆک لە هەرێم کوردستان، ئەرا سێ مەتر ونیم داوەزیا، ئەوەیش دویای ئەوەگ حکومەت تورکیا بەنداویگ لە باشوور شار سلوبی دروس کرد.
وەڕیەوبەر فەرمانگەی ئاویاری دهۆک هێژا عەبدولواحید ئەرا ئاژانس شەفەق نیوز وت: تورکیا رازی نییە ئامێر لەبان چەمەگە دانریەێد، و تا ئیسە نیەتوەنیمن ئامێر پەیمانەکردن بڕ تەکان ئاوەگە وبەرز ونزمی ئاست ئاوەگە لەبان چەمەگە دانەیمن، وتیش: تورکیا نیەیلێد ئەندامەیلمان بڕەسنە کنار ئاوەگە.
عەبدولواحید وتیش: لایەن تورکیا بەنداو گەپیگ وە بەرزی ٨٠ مەتر لە ناوچەی ئەسپرتیم سەروە شار سلوبي تورکیا لە ساڵ ٢٠١٢ بینا کرد.
پەیامنێر ئاژانس شەفەق نيوز لە دهۆک ئویشێد: باخەیل دەیان لە ئاوایەیل کنار چەمە هیزل باکوور زاخۆ بوینە زەوی چووڵ، و ئاژەڵەیلیش ئەرا شوینەیل دویریگ بریان.
محمد عەلی کشاوزە لە خەڵک رەبتکا لەبان کنار چەم هیزل، ئەرا پەیامنێر ئاژانس شەفەق باس زیان کشاوەرزەیل ناوچەگە کەێد، و ئویشێد: نیەتوەنیمن بڕەسیمنە کنار چەمەگە لە زەوی عراق، و هەمیش وەپیمان نیەکریەێد ئاو ئەرا دالیەمان باریمن.
وتیش: تورکیا نیەیلێد، ک دەسەڵاتەیل تورکیا چەن جاریگ تەقە لە خوەمان وئاژەڵمان کرد، و داوای چارەیگ ئەرا ئی گیچەڵە کرد.
جی باسە ک چەم هیزل ناوبەین سنوور تورکیا و عراق لە کویەیل تورکیا دەرچوود، و لە ناوچەی سناتی تیەێدە ناو عراق، و وە درویژی ٣٦ کیلومەتر وەناو زەوی عراق رەد بوود، و چوودە ناو چەم خابوور لە ناوچەی ئیبراهیم خەلیل.
