بەنداوەیل هەرێم کوردستان داوەزیان تیژیگ لە داهاتەیل ئاو توومار کەن

شەفەق نیوز/ هەرێم کوردستان، لەوەر کەمەوبوین ریژەی وارانبارین و ئاو هەڵگریای لە بەنداوە سەرەکییەیلی ئمساڵ کەفێدە وەر سەختیەیل زیاتر، بەڵام لایەنە پەیوەندیدارەیل دووپات کەن کە ئی بڕە ئاوەیلە وەردەوامن لە دابینکردن خوازینەیل سەرەتایی هاوڵاتیەیل لە شمارەیگ لە پارێزگایایل.

لەی باوەتە وەڕێوەبەر گشتیی بەنداوەیل هەرێم کوردستان، رەحمان خانی، دووپات کرد کە "ئەو ئەمبارکردن ئاوە لە بەنداوەیل دوکان، دەربەندیخان، و دهۆک وەردەسە، بەش فرەی خوازینەیل مەردم لەی ساڵە کەن، هەرچەن داوەزیان وەرچەو لە سەرچەوە ئاوییەیل هەس وەچەو ساڵەیل گوزەشتە".

خانی ئەرا ئاژانس شەفەق نیوز وت: "پلان وەڕێوەبردن سەرچەوە ئاوییەیل ئمساڵ رووشنایی خەێدە بان دەسەوەرکردن ئاو نووشین و کەمکردن وەکارهاوردن ئاو ئەرا کشتوکاڵی، گرنگی تەنیا لە پڕۆژە خوازیاگەیل". وتیش: "داهات ئاو ئەساڵ داوەزیان وەرچەویگ وەخوەی دیە، بەنداو دوکان تەنیا نزیکەی 600 ملیۆن مەتر سێجا وەرگردیە، کە شمارەیگ کەمترە لە ساڵەیل گوزەشتە".

لای خوەییش؛ ەەڕێوەبەر گشتیی بەنداو دوکان، کۆچەر جەمال، دڵنیایی دەێدە مەردم لە بویین ئاو نووشین، دووپاتیش کرد کە "ئەو ئەمباریلە ئیسە بەسە ئەرا دابینکردن خوازینەیل ناوچە سودمەندەیل تا کۆتایی تاوسان".

 جەمال ئەرا ئاژانس شەفەق نیوز وت: "ئەو بڕە وارانوارینە تا ئیسە وەرگریاس تەنیا رەسیەسە نزیکەی 188 ملم، کە وە نزیکەی یەک لەبان سێی ئەو بڕە واران ساڵ گوزەشتە توومارکریاس. بەڵام رەوش ئاوەگە هیمان دڵنیاکەرە لەوەر پلاندانان وەڕێوەبردن ئاو".

وتیش: "بەنداو دوکان ئاو ئەرا نزیکەی چوار ملیۆن کەس دابین کەێد کە لە چەن ناوچەیگ هەن، لەوانە سلێمانی، رانیە، کەرکوک و توزخورماتوو لە پارێزگای سەڵاحەدین"، وتیش: "گرنگی بەنداوەگە جویر پەلیگ ستراتیژی ئەرا دەسەوەرکردن ئاسایش ئاو ئەرا ئی ناوچەیل گرنگە".

ھەرێم کوردستان ٢١ بەنداو دیرێد، دوو لەو بەنداوەیلە، بەنداو دوکان و دەربەندیخان ئەرا بەرهەم کارەبا ئەرا چەن ناوچەیگ وەکار تیەن.