بەغداد نزیکەی یەک تریلیۆن دینار خەێدە بان هەشمار دارایی هەرێم کوردستان ئەرا مەرەقەزکردن مووچەی فەرمانبەرەیل

شەفەق نیوز/ وەزارەت دارایی و ئابوری هەرێم کوردستان ئمڕوو سێشەممە، راگەیان بڕە پویلیگ کە ئەرا مووچەی فەرمانبەر و کراکارەیل کەرت گشتی مانگ نیسان گوزەشتە دابینکریاس خریاسە بان هەشمار بانکیان، گام دانەن ئەرا ئامادەکاری خەرجکردن مووچە لەماوەی چەن رووژ ئایندە.

وەپای بەیاننامەیگ کە لە وەزارەت دارایی و ئابووری هەرێم کوردستان دەرچگە و ئاژانس شەفەق نیوز دیەسێ هاتیە، ئمڕوو سێشەممە بروار  13 ئایار 2025، بڕ (959,514,000,000) نۆسەد و پەنجا و نۆ ملیار و پەنسەد و چواردە ملیۆن دینار خریاسە بان هەشمار بانکی وەزارەتەگە.

لە بەیاننامەگە ئاشکرایکرد، ئەو بڕە دابینکریاس ئەرا مووچەی فەرمانبەرەیل و کراکارەیل و خاوەن مووچەیلن لەبان هەرێم کوردستان و خریاسە بانک وەزارەت دارایی و ئابووری هەرێم کوردستان لق بانک ناوەندی عراقی.

چەوەڕێکرێد لایەنەیل پەیوەنیدار لە حکومەت هەرێم وەی نزیکە دەسبکەن وە دانان خشتەی خەرجکردن مووچە.