بەیاننامەی سەرۆکایەتی هەرێم کوردستان لەباوەت گردەوبوین حزەبیل کوردستانی
شەفەق نیوز/ سەرۆکایەتی هەرێم کوردستان، ئمڕوو چوارشەممە، بەیاننامیگ لەباوەت گردەوبوین حزبەیل کورد ئەرا هەڵوژاردن هاتگ لە هەرێم کوردستان دەرکرد.
سەرۆکایەتی هەرێم کوردستان لەو بەیاننامە ک رەسیە ئاژانس شەفەق نیوز وت: وە سەرپەرشتیاری نێچیروان بارزانی سەرۆک هەرێم کوردستان، و ئامادەبوین جینین بلاسخارت نوینەر نەتەوە یەکگرتگەیل لەناو عراق، وەگەرد لایەنەیل سیاسی کوردستانی، گردەوبوین ئەرا باسکردن لە هەڵوژاردن هاتگ لە هەرێم کوردستان ئەنجام دریا.
بەیاننامەگە وتیش: نێچیروان بارزانی سەرۆک هەرێم کوردستان دەسخوەشی لە بلاسخارت و لایەنەیل سیاسی کرد ئەرا جیوەجیکردن مکیس سەرۆکایەتی هەرێم کوردستان، وباس لە ئومیدی کرد ک لایەنەیل سیاسی بڕەسنە لەیەکفامستن ئەرا دیاریکردن مەوقەی ئەنجامدان هەڵوژاردن و چارەکردن گرفتەیل.
بارزانی دووپات کرد لە گرنگی هەڵوژاردن ئەرا هەرێم کوردستان، و وت: دیرکوفرن هەڵوژاردن ناو و پایەی هەرێم کوردستان بەدناو کەێد.
لەلای خوەییش، بلاسخارت لە وتاریگ باس گرنگی رەسین لایەنەیل ئەرا لەیەکفامستن لە باوەت هەڵوژاردن ودیاری مەوقەی ئەنجامدانی، و نشان پاڵپشتیکردن تەواوی نەتەوە یەکگرتگەیل ئەرا سەرکەفتن هەڵوژاردن کرد، و دووپات لەوە کرد ک بایەتە بڕەسنە ئەنجامیگ وە نزیکترین وەخت، چوینکە وەخت فرەیگ وەدەس نییە.
دویای ئەوەگ موستەفا سەید قادر ڕاپۆرت دەسەی سەرۆکایەتی هەرێم کوردستان لە ئەرک چەودیریکردن باوەت هەڵوژاردن خستە وەردەس، لایەنەیل سیاسی را ونووڕینیان لەی باوەتە خستنە وەردەس، و دەسخوەشی لە سەرۆکایەتی هەرێم کوردستان کردن ئەرا دەسمیەتی وەخاتر گردەوکردن لایەنەیل سیاسی، و وەردەوامی گردەوبوین و گفتوگۆ وە کار خاسیگ دانان.
لە کۆتایی، بڕیار دریا گردەوبوینیگ ئەرا یەکلاوەکردن باوەتەیل هەڵوژاردن وچارەکردن گرفتەیل نوای ئەو کارە دریا، ئەوەیش لە سەرەتای ئەیلول ئایندە، و سەرۆکایەتی هەرێم کوردستان و لایەنەیل سیاسی وەدەسمیەتی لایەنەیلیگ پسپۆڕ لە یونامی وەردەوام بوین لە چارەکردن گرفتەیل وەئامادەبوین تا ئەو مەوقە.
وەرجەیە، ئمڕوو چوارشەممە، لایەنەیل کوردستانی رێککەفتن لە مەنین یاسای هەڵوژاردن جویر خوەی، وە مەرجیگ رووژ دەنگدان گشتی لە هەڵوژاردن پەرلەمان لە هەرێم کوردستان تەنیا ئەرا گشتی بوود، بیجگە دەنگدان تایبەت ئەرا ئەندامەیل هیزەیل پێشمەرگە و هیزە ئەمنیەیلە.
وەگورەی ئەو زانیاریەیلە ک پەیامنێر ئاژانس شەفەق لە هەولێر باسیان کرد، گردەوبوینەگە هەمیش رەسیە گورجەوکردن کۆمسیۆن باڵای سەروەخوەی هەڵوژاردن و ریفراندۆم لە هەرێم کوردستان.
هەرلیوا، وەگورەی پەیامنێر ئاژانسمان، بڕیارە گردەوبوینیگ تر لە سەرتای مانگ ئەیلول ئایندە ئەنجام بیریەێد.
