بارزانی لە پێروزبایی وە نەورووز: رازی وە دەرچگن لە رینمای یەکێتی رەزامەنی وەگەرد عراق نێەویمن
شەفەق نیوز/ مەسعود بارزانی سەرکردەی کورد و سەرۆک پارت دیموکرات کوردستان، ئمڕوو شەممە، وەبۆنی جەژنەیل نەورووز و سەر ساڵ نوو کوردی پێروزبایی ئاڕاستە کرد.
نووسینگەی بارزانی لە بەیاننامەیگ رەسیە ئاژانس شەفەق نیوز وت: وە بۆنی جەژنەیل نەتەوەیی نەورووز، ئاڕاستەی پێروزبایی ئەرا خیزانەیل شەهیدان و پێشمەرگە پاڵەوانەکان و گشت چینەیل گەل کوردستانی و کشت گەل کوردی لەو بەشەیل کوردستان و گشت جهان کەێد، وتیش؛ هەمیش پێروزبایی لە گشت نەتەوەکان کەێد ک نەورووز وەبەشیگ لە کەلتوریان دانەن.
بارزاني دیاری کرد ک نەورووز ئەرا گەل کوردستان بیجگە هاتنەوەی وەهار و نووەوبوبن سرووشت، واتەی ئازادی و راپەڕین دژوە ستەمکارەیل دەێد، و کورد ئەرا قورتاربوین لە کوێلایەتی و ئامانجکردن ئازادی لە نەورووز راپەڕین کرد، و هەست راپەڕینەگە و ئازادی کورد لە زویەو بویەسەی و ئمڕوویش هەسەی و تا ستەم هەس هەر مینێدەی.
بارزانی وتیش؛ گەل کوردستاتی باوەڕ وە پێکەوەژیان نەتەوەیی و را و هویر جووراجور دیرێد، و خوەی خاوەن کەلتووریگ مێژووی قویلیگە لەی باوەتە، و بنەمایل پێکەوەژیان وەشیوەیگ زانستی جیوەجی کرد، و ئاماژە کرد ک لە خود وەختەگە هەست ئازادیخوازی و پێکەوەژیان کوردی هەمیشە وەگەرد دووسی ئاشتی تیکڵا بویە.
بارزانی وتیش؛ گەل کوردستان خوازێد چارەنووس خوەی وە شیوەیگ ئاشتەوایی دیاری بکەێد، و گرفتەکان وە ریەیلیگ ئاشتەوایی چارەسەر بکەێد، و باوەڕ وە جەنگ و توندوتیژی نەیرێد، و وەگەرد ئەوەیش وە ستەم و دژایەتی لە هیچ لایەنیگ رازی نێەوود، و هەنای کارەگە رەسێدە وەکارهاوردن ستەم و دوژمنی لەبانی ئەو وەختە وەرگری لە مافەیلی کەێد.
بارزانی دووپات کرد ک خوەی ئارەزوو دیرێد و هەمیشە خوازێد لەبنەمای هاوبەشی گشت گرفتەیلی وەگەرد بەغداد چارەسەر بکەێد، و گەل کوردستان لە بنەمای یەکێتی رەزامەنی وەگەرد عراق هاوبەشە، و وەکارهاوردن زوان زۆرینە و کەمینە و کەلتور خوەی چەسپانن وە رەتکردن، بی گومان بوودە هووکار چارەسەرنەکردن گرفتەیل.
