ئایا جەنگ رووسیا و ئۆکرانیا زەرەدیگ وە بازرگانی کوردستان دیرێد؟
شەفەق نیوز/ ژوور بازرگانی و پیشەسازی سلێمانی وت: جەنگ رووسیا و ئۆکرانیا کاریگەری لەبان بازرگانی ناوبەین هەرێم کوردستان و ئۆکرانیا نەیرێد، و وسیان بازرگانیەگە کاریگەری لەبان بازاڕ ناوخۆیی نەیرێد، چۊنکە ئەو چشتەیلە لە دەوڵەتەیل هاوسا هەس، وهاوردە کریەێد.
وەسفی خەلیل ڕاوێژکار کشتوکاڵی لە ژوور بازرگانی و پیشەسازی سلێمانی ئەرا ئاژانس شەفەق نیوز وت: رووسیا و ئۆکرانیا دوو دەوڵەت بەرهەمکاری گەنم کەن و ٣٥% لە بەرهەم گەنم لە بازاڕەیل جەهان دیرن، و ئی جەنگە هەڵبەت کاریگەری لەبان جۊلەی گەنم لە بازاڕەیل جەهانی دیرێد، باوجی بازاڕەیل هەرێم کوردستان نێکەفێدە ژیر کاریگەری فرەیگ چۊنکە سەرچەوەیلیگ تر ئەرا هاوردەی گەنم دیریمن.
وتیش: هەرێم ساڵانە لە ٥٠٠ تا ٦٠٠ هەزار تەن لە گەنم خوازێد، باوجی ئیمە لە چەن ساڵیگ لەیە زیاتر بەرهەم کردیمنە، ک نێلێد بکەفێمنە ژیر کاریگەری وە بەرهەم دەیشتەکی.
وتیش: ژوور بازرگانی و پیشەسازی سلێمانی پلان رێکیگ ئمساڵ دیرێد، ئەوەیش وەگەرد واران فرەی ئمساڵ ک هیلێد مەزەنە بکەیمن ئمساڵ بڕەیل فرەیگ لە گەنم بەرهەم بکەیمن، و دووپات کرد ک ئەمار گەنمەگە بەش هەرێم کەێد تا بڕەسێمنە درەو گەنم، و شایەت ئەمارەگەیش زیاترەو بکەێد.
وەسفی دیاری کرد ک حکومەت هەرێم کوردستان بەڕنامەیگ تایبەت دیرێد، ک ئەو گەنمە لەلایەن حکومەت عراق بەشەو کریەێدە بان هاووڵاتییەیل و هەمیش ئەو بڕە ک مەنیە دریەێدە سێ کۆمپانێا وە نرخیگ گونجیاگ، تا بەرهەمەگە لەناو بازاڕەیل هەرێم بمینێد.
