یانەی تووپان خانەقین لەوەر رەفتارەیل ناو دۊاترین بازیی کارەیلی وەگەرد یەکێتی کوردستان وسنێد
شەفەق نیوز/ ئیدارەی یانەی خانەقین، ئمڕوو چوارشەممە، بڕیار دا گشت چالاکیەیل تووپانی لەناو یەکێتی تووپان کوردستان بووسنێد، لە ناڕەزایی لەبان رەتکردن داواکاریی وە دووارەکردن بازیەگەی لە خول نایاب کوردستان وەگەرد یانەی چوار قورنه، ک لە مانگ گوزەشتە وەڕیەو چگ، و هەمیش دیاری کرد ک ئەوەسا ستەمدیدەیی خەێدە وەردەس وەزیر وەرزشی لە هەرێم کوردستان.
حسێن شیرزاد سەرۆک یانەگە ئەرا ئاژانس شەفەق نیوز وت: ئیدارەی یانەی خانەقین بڕیار دا کارەیلی لەناو یەکێتی تووپان کوردستان بووسنێد، چۊنکە یەکسانی وەرد یانەگە نەکریا، و داواکاریەیلی وە دووارەکردن بەشیگ لە بازیەگەی ک بازی شایستانە و یەکلاکەرەوە بۊ لە خول نایاب وەگەرد تیم چوارقورنە جیوەجی نەکریا ک لە مانگ گوزەشتە وە رەوش و کەشوهەوایگ وەڕیەو چگ ک دۊر لە تووپان و رکابەری شەرعی بۊ، و ئەو دەسدرۊژیە ک یانەی خانەقین کەفتە وەری جی قەبووڵکردن نییە.
شیرزاد وتیش: یەکێتی کوردستانی بڕیار دا دۊاترین ١٠ خولەک لە بازیەگە وەگەرد یانەی چوار قورنه لە یاریگایگ بیلایەن جۊر هەولێر دووارە بکریەێد، و ئەوە قەبووڵ نەکردیمن، ئیجا وەختەگە کریا چارەکیگ هەمیش قەبووڵی نەکردیمن، و داوا کردیمن دۊەم شەوت بازیەگە یا دۊاترین نیم ساعەتی دووارە بکریەێد.
شیرزاد دیاری کرد ک بازیگەرەیل خانەقین لە بازی یەکلاکەرەوەیان لە ناحیەی چوارقورنە سەروە ئیدارەی راپەرین- قەزای رانیە سەروە پارێزگای سلێمانی کەفتنە وەر دەسدرۊژی و تەنگەوکردن لەوەر چەو دەزگا ئەمنیەیلە ک بازیگەرەیل تا زیاتر لە یەک ساعەت و نیم لەناو یاریگاگە گیر هاتن، لەناو ئامادەبۊن جەماوەری ک لە شۊن یاریگاگە زیاتر بۊ ک بەش ٤٠٠٠ هەزار کەس کەێد، لەوەختیگ زیاتر لە ١٠٠٠٠ کەس ئەرا زوورهاوردن لەبان یانەی خانەقین و بازیگەرەیلی هاتنە ناو یاریگا.
سەرۆک یانەی خانەقین وتیش: ئیمە هەر یەکسانی تواستیمن ک تەنیا یەک خاڵ لەو بازیە وەگەرد چوارقورنە بەێدەمانە بان، ک ئیمە لە خول پلەی یەکەم سەرکەفتیمنە باوجی شیوەیل رێکخستن و ئاسیاش بازیەگە لەو سەرکەفتنە بیبەشمان کرد، و ناچار بۊمن وەخاتر سەڵامەتی بازیگەرەیل خوەمان بکیشیمنەو.
شیرزاد وتیش: ئەوەسا یانەگەی ستەمدیدەیی فەرمی خەێدە وەردەس وەزیر وەرزشی و گەنجەیل لە حکومەت هەرێم کوردستان، دۊای ئەوە ک لە دەیشت وڵاتەگە گلەو خوەێد، لە تەقەلایگ ئەرا وەرگردن مافەیلی و یەکسانیکردنی.
