ئامارەیل پۆلیس سلێمانی: دەسگیرکردن ١٠٠ توومەتبار وەماوەی ٤٥ رووژ
شەفەق نیوز/ پۆلیس پارێزگای سلێمانی، ئمڕوو شەممە، ئاماریگ راگەیان ئاژانس شەفەق نیوز وەشیوەیگ تایبەت چەودێریی کرد، ک دەسگیرکردن ١٠٠ توومەتبار وە باوەتەیلیگ جیاجیا، تەنیا وەماوەی ٤٥ رووژ،، و بەشیگیان لە نەوەتەیل سەدەی گوزەشتە داوا کریانە.
وەگورەی چەودیریکردن تیم ئاژانس شەفەق نیوز؛ ئەو بەیاننامە و ئامارەیل فەرمیە لە وەڕێوەبەرایەتی پۆلیس پارێزگای سلێمانی دیاری کەن ک لە ماوەی ئی مانگ نیسانە، ١٠٠ توومەتبار وەتوومەتەیلیگ جیاجیا دەسگیر کریانە، و لە یەک تا چوار نیسان ٣٣ توومەتبارتر دەسگیر کریانە.
لەلای خوەییش سەرکەوت ئەحمەد قسەکەر وەڕێەوبەرایەتی پۆلیس پارێزگای سلێمانی لە بەیاننامیگ رەسیە ئاژانس شەفەق نیوز دیاری کرد ک ئەوانە وەگورەی یاداشتەیلیگ لە نەوەتەیل سەدەی گوزەشتە دەسگیر کریانە،
و دیاری کرد ک چین توومەتەیل بانیان لە تاوان کوشتن و دزیکردن و خەڵەتانن و جادوبازی و هووشبەری و مرافە و قاچاخی و تاوانەیلیگتر بویە.
هاووڵاتییەیلیگ ئەرا ئاژانس شەفەق نیوز وتن: پۆلیس سلێمانی تەقەلایل گەورەیگ دەن ئەرا مقیەتیکردن ئاسایش و ژیان هاووڵاتییەیل و ئەندامەیلی کار وە رەنج دیاریگ ئەرا مقیەتیکردن ئاسایش شارەگە کەن، تایبەت ک رووژانە سەدان گەشتیار لە جوراجور ناوچەیل عراق سەردان سلێمانی کەن.
