ئاشکراکردن بەش کوردستان لە بوودجەگە و مووچەی پێشمەرگە
شەفەق نیوز/ شیروان میرزا ئەندام دەسەی دارایی پەرلەمانی، ئمڕوو چوارشەممە، ئاشکرای بەش هەرێم کوردستان کرد لە بوودجە گشتیەگە ئەرا ساڵ دارایی ٢٠٢٠ ، و ئەو پویلەگ تەرخان کریاگە ئەرا مووچەی هێزەیل پێشمەرگە.
میرزا ک خوەی پەرلەمانتارە لە یکێتی نیشتمانی کوردستان وت: لە پڕۆژەی یاسای بوودجە گشتیەگە ئەرا ساڵ ٢٠٢٠ وەگورەی زانیاریەگان، بەش هەریم وە رێژەی ١٢،٦٧% دیاری کریا، وهەمیش دیاری بوودجەی پێشمەرگە کریا وە ٧٦ ملیار دینار لە مانگیگ، ک سآڵانە رەسێدە ٩١٢ ملیار.
وتیش: دوو مادە لە بوودجەگە هەس پەیوەندی وە یەکلاکردنەوەی قەرزەگان دیرێد لەناوبەین هەریم وبەغداد لە ساڵ ٢٠١٤ تا ساڵ ٢٠١٨ ، و لەباوەت قەرز وپابەندیەگان هەرێم کوردستان ک باس لەلی کریا، مادەیگ هاناوی پابەند هەریم کەێد وە ئاشکراکردن گشت بەیاننامەگان، تا بزانیمن ئەرا هەرێم قەرز کردگە، وقەرزە کەڵەکە کریایەگان چەیگە؟ و بایەدە لەماوەی ٣٠ رووژ بوود.
وتیش؛ لە ماوەی ٩٠ رووژ دەسەیگ لە دیوان چەودیری دارایی فیدڕاڵی درەوس کریەێد ئەرا نووڕستن لەو قەرزەیلە ئەرا زانستن هووکارەگان لە رویکردن حکومەت هەرێم ئەرا قەرزکردن، وچوون ئەو قەرزەیلە خەرج کریان، ولەژیر کام دەسپیچگ یاسایی پەنا وەقەرزکردن برد.
میرزا ئاماژەکرد ک بوودجەگە هەمیش باس نەفت کەرکوک کرد، ک رەسێدە ٣٥٠ هەزار بەرمیل لە رووژیگ لە ری بووری گواستنەوەی نەفت لە هەرێم، وکرای بووریەگان لەلایەن حکومەت فیدڕاڵی دریەێد، ئەیە خاڵەگانە، و وەرانوەر ئەیە بایەدە هەرێم رووژانە ٢٥٠ هەزار بەرمیل نەفت بەێدە کۆمپانیای سۆمو و هەمیش رێژەی ٥٠% لە داهاتەیل مەرزە سنوریەگان.
لەباوەت بوودجەی ساڵ ئایندە، ئەندام دارایی پەرلەمانی وت: شاندیگ هونەری لە هەرێم کوردستان، هالە بەغداد و تەقەلا دەێد لە کۆبونەوەگانی ستڕاتیژیگ دانەێد ئەرا بوودجەی ساڵەیل ئایندە، واتە حکومەت هەرێم وە شاندە هونەریەگەی هیمان وەردەوامە لە گفتوگۆەیلی وەگەرد بەغداد، و بوودجەی ٢٠٢١ هیمان هالە چین ئامادەکردن لەلای حکومەت، وهیچ ووردەکارەییگ تا ئیسە دیارنیە.
بڕیارە رووژ شەممەی ئایندە پەرلەمان عراق دەسبکەیدە باسکردن لە بوودجەی دارایی ئەرا ئی ساڵە.
