کارەبای کوردستان: وزەی ئیمە فرە گەنە
ئومێد ئەحمەد، قسەکەر وەزارەت کارەبا لە حکومەت هەرێم کوردستان ئەرا ئاژانس شەفەق نیوز وت: “ئیرنگە رەوش کارەبا فرە بەدە لەوەر ئەو پەلامار تیرۆریستیە کە کێڵگەی کۆرمۆر کردە ئامانج لە سلێمانی”.
وتیش: "ئەو کارەبا کە ئیرنگە لە گشت سەرچەوەیلی ها وەردەس، لە ناوەین (1500 تا 1600) مێگاواتە، یەیش بەس نییە ئەرا دابینکردن خوازینەیل وزەی پارێزگایل هەرێم، بەڵکم تەنیا بەسە ئەرا رەوش نائاسایی".
دیاری کرد کە "ئەو وەئامانجکردنە زیان (2500) مێگاوات لەلی کەفتەو، " و کارکردن وێستگەیل کارەبا لە بەنداو دوکان و دەربەندیخان وە تەواوی توانای بەرهەم خوەیان لە (500) مێگاوات زیاتر نییە، ئەوەیش ئەرا کار پەمپەیل ئاو نووشینە."
لەباوت پەیاکردن چارەسەری وەرد هاتن وەرز تاوسان، قسەکەر فەرمی وەزارەت کارەبای کوردستان دووپات کرد کە “بیجگە لە گلەوداین بەرهەم غاز لە کێڵگەی کۆرمۆر هویچ چارەسەریگ لە ئارا نییە”.
هەمیش وت: "گشت ریکارەیل وەزارەتی کارەبا تەواون و هویچ گیچەڵیگ لەناویان نییە بیجگە لە پرۆسەی غاز".
دیاری کرد کە د "سێ وێستگەی گەپ هەن کە وزەی کارەبا بەرهەم کەن، وە تەواوی پشت وە غاز کۆرمۆر بەسن و ئەی پرسە وە هویچ شیوەیگ بیجگە لە وەدەسهاوردن غاز لە کێڵگەگەو چارەسەر نیەکریەێد".
لە باوەت وسیان دەوام لە کێڵگەکای کۆرمۆر لەلایەن کۆمپانیای “داناغاز” ئیماراتی، ئەحمەد وت: وسیان دەوام تەکنیکی نییە، بەڵام دڵەڕاوکی دەروینی لای کرێکارەیل هەس، وەتایبەتی دویای کوشیان چوار کرێکار لە وەخت پەلامارەگەی ئی دویاییە”.
