40 کۆمپانیای ئەمریکی چەوەڕی کەن.. دانوسەنین عراقی "خەسیگ" ئەرا یەکلاکردن دۆسیەی چەک باڵەیل

شەفەق نیوز- بەغداد

سەرچەوەیگ ئاگادار، رووژ شەممە، ئاشکرای وەردەوامبۊن گردەوبۊنە تایبەتەیل لە ناوەین دەسەی چواری و سەرکردایەتییەیل باڵەیل وەرگری چەکدار کرد، وە ئامانج رەسین وە رێککەفتنەیل کووتایی لەباوەت وەڕێوەبردن چەک و ئەممارکردنی و رێکخستنی، وە دووپاتکردن ئەوەگ چارەسەرکردن ئی دۆسیە ری خوەش کەێد ئەرا هاتن فرەتر لە 40 کۆمپانیای ئەمریکی ئەرا ناو عراق ئەرا دەسوەپیکردن پرۆژەیلیان.

سەرچەوەگە، ئەرا ئاژانس شەفەق نیوز وت، کە "عەلی زەیدی، سەرۆک حکومەت عراقی داوا لە سەرکردایەتییە سیاسییەیل لە چوارچیوەی هەماهەنگی، و وە تایبەت دەسەی چواری پەیوەندیدار وە دانوسەنین وەرد باڵەیل کرد، گفتوگۆ و دیداریەیل خەسەو بکەن ئەرا رەسین وە لەیەکفامستنەیل کە کووتایی وە مشتومڕ لەباوەت وەڕێوەبردن و رێکخستن چەک بارێد، وەیجۊرە کە گونجیاگ بوود وەرد بەرژەوەنی عراق و ناوچەگە".

وتیش کە "واشنتۆن داوای گەرەنتی لە زەیدی کردگە، وە نەکردنە ئامانج ئەو کۆمپانیا ئەمریکییەیلە، کە شمارەیان لە 40 کۆمپانیای بەرهەمهاوردن لە بوارەیل جیاواز زیاترە، لەلایەن باڵەیل وەرگرییەو".

وەپەی قسەی سەرچەوەگە، گردەوبۊنیگ گرنگ وە چەودیاری سەرۆک حکومەت دۊای گلەوخواردنی لە واشنتۆن وەڕیەو چوود، لە ناوەین دەسەی چواری دەرچگ لە چوارچیوەی هەماهەنگی و سەرکردایەتییەیل ئەو باڵەیلە کە قسە دیرن لەبان رادەسکردن چەک، وە ئامادەبۊن باڵیۆز ئیرانی یا ئەوەگ نۊنەرایەتیی کەێد، ئەرا باس لە گیرهاوردن و رێکخستن وەڕێوەبردن چەک وە شیوەیگ فەرمی، و مسۆگەرکردن نەکردنە ئامانج کۆمپانیا ئەمریکییەیل کە رەسنە ناو عراق دۊای دەرچگن فەرمی هێزەیل ئەمریکی لە وڵاتەگە وە شیوەیگ کووتایی.

دیاری کرد کە "گردەوبۊنەگە هەمیش باس لە دۆسیەی تیکەڵکردن ئەندامەیل ئەو باڵەیلە لەناو دەسەی حەشد شەعبی ماوەی سێ مانگ کەێد"، وە دیاریکردن ئەوەگ "سەرکردەی باڵەیل یە رەت کەن، وەلی شایەت هەڵوێستیان دۊای گردەوبۊنەگە ئاڵشت بوود، و گشتیان پشت وە یە بەسن".

لە لای خوەیەو، سەرکردە لە رەوت قەسەم نیشتمانی، کە لەناو هاوپەیمان دەوڵەت یاساس، عەبدولڕەحمان جەزائیری، ئەرا ئاژانس شەفەق نیوز دووپات کرد، کە "سەرکردەی هەر چوار باڵەگە کە دانوسەنین وەردیان کریەێد لەلایەن دەسەی چواری داوای دەرکردن یاسایگ تایبەت وە گیرهاوردن چەک و وەڕێوەبردن و رێکخستنی لەلایەن ئەنجومەن نۊنەرەیل کردنە، تا شیوەی یاسایی و فەرمی بگرێد، و مافەیل ئەو باڵەیلە بپاریزێد لەناو یەک ناو لە دەسەی حەشد شەعبی".

جەزائیری دیاری کرد، کە "دۆسیەی گیرهاوردن چەک وە شیوەیگ راسەوخۆ بەسیا وە پەیوەندی عراقی ئەمریکییەو، لەوەر ئەوەگ چتر دۆسیەیگ ناوخۆیی نییە".

 وتیش کە "سەرۆک وەزیرەیل دۊای گلەوخواردنی کار کەێد لەبان زۊکردن رێکارەیل تەواوکردن کابینەی وەزاری، و وە تایبەت هەردگ وەزارەت ناوخۆ و وەرگری، لەبان ئەوەگ پرۆسەی دەرچگنەگە، وەپەی پرۆتۆکۆڵ پەسەنکریاگ، خوازین ئەوە کەێد کە رادەسکردن و دەرچگن ئەمریکی لەڕی واژووکردن پرۆتۆکۆڵیگ فەرمی وەرد ئەو وەزیرەیلە جیوەجی بوود کە پەیوەندیدارن وە دۆسیەی ئەمنی، لەوەر ئەوە بایەسە هەردگ وەزیر ناوخۆ و وەرگری هەڵوژریەین".

 لە وتاریگ لە کۆمەڵەی گشتی نەتەوە یەکگرتگەیل، سەرۆک وەزیرەیل عراقی، عەلی زەیدی، دۊکە جمعە دووپات کرد، کە لە کارەیل لەپیشینەی حکومەتەگەی ئەوەسە کە دەوڵەت خاوەن بڕیار بوود لە ئاشتی و جەنگ، وە دووپاتکردن بان ئەوەگ چەک و ئامرازەیل هێز بایەسە لە دەس دامەزراوە دەستوورییەیل دەوڵەت بمینێد، و ئەوەگ یاسا یەکلاییکەر بوود و بەرژەوەنی نیشتمانیش رویکردن بوود.