35 % لەو بارەیل نەفتە کە لەڕی هورمزەو دەرچوود عراقیە
شەفەق نیوز- وەدۊاچگن
داتایەیل کۆمپانیای "کێپلەر" نیشان دان، کە جۊلەی دەریاوانی لەڕی گەروو هورمزەو ماوەی هەفتەی گوزەشتە کەم کردیە، وەرد وەردەوامبۊن کەمەوبۊن شمارەی ئەو کەشتییەیلە کە لەی رێڕەو ئاوی گرنگە ئەرا هەناردەیل نەفت لە ناوچەگە رەد بوون.
داتایەیل نیشان دان کە سعودیە دەس گردیەسە بان نزیکەی نیمەی ئی هەناردەیلە، لە وەختیگ بەش عراق رەسیەسە 35% لە بڕ بارەیل نەفت خاو کە ماوەی ئەو هەفتە لە گەرووەگە دەرچگە.
13 بارهەڵگر نەفت لە گەروو هورمز دەرچگن ماوەی ئەو هەفتە کە لە 13ی ئەیلول/ سێپتەمبەر 2026 دەس وەپی کرد، کە بارکریانە وە نزیکەی 34 مەلیۆن بەرمیل لە نەفت خاو.
ئی داتایەیلە لە وەختیگ تیەێد کە هیمان جۊلەی دەریاوانی لەڕی گەروو هورمزەو وە شیوەیگ گەورا نزمە لە وەرانوەر ئاستەیل وەرجە جەنگەگە، چۊنکە گەرووەگە وە ئاسایی رووژانە پبشوازی لە نزیکەی 125 کەشتی بازرگانی گەورا کردیاد وەرجە دەسوەپیکردن جەنگ لە 28 شوبات.
داتایەیل ئمڕوو دووشەممە، نیشان دان کە 12 کەشتی کاڵای سەرەتایی لە سەرەتای هەفتەگە لە گەروو هورمز رەد بۊنە، وە کەمەوبۊن لە 35 کەشتی لە سەرەتای هەفتەی وەرجەتر، لە سای وەردەوامبۊن ئاڵووزی لە کەنداو وەرد مەنن رەوشەگە لە ناوەین ئەمریکا و ئیران لە شیوەیگ وسیای.
جۊلەی دەریاوانی دیار لەڕی گەرووەگە کەمەو بۊ، کە وەرجە جەنگەگە رێڕەویگ بۊ ئەرا یەک لەپەنج دابینکردنەیل نەفت و غاز سروشتی جەهان، ئەرا ئاستەیلیگ فرە دیاریکریاگ، وەلی بەرهەمهاورەیل لە خوەرهەڵات ناوڕاس وەردەوامن لە هەناردەکردن نەفت لەبان بارهەڵگرەیلیگ کە رەد بوون و ئامێرەیل کلکردن و وەرگردن بەسن.
