کازمی وردەکاری قاقەزە چەرمگەگەی ئاشکرا كرد
شەفەق نیوز/موستەفا کازمی سەرۆک وەزیران، ئمڕو دووشەممە، ووردەکاریەگان قاقەزە چەرمگەگە راگەیان ک ئەنجومەن وەزیران داناگەی، و خاسەوکردن ئابووری ودارایی و وەڕیەوبردنی هەڵگرێد، و ٤ کرت دیاری کرد ئەرا چارەسەرکردن رەوشەیل ئیسە.
نووسینگەی کازمی لە بەیاننامەیگ ك رەسیە ئاژانس شەفەق نیوز وت: سەرۆک وەزیران ئمڕوو دووشەممە، کۆبونەوەیگ بەسا وەل وەرپرس وئەندامەیل دەسەی ئابووری و وەبەرهەمهاوردن پەڕلەمانی، لەناوی باس قاقەزە چەرمگەگە کریا ک ئەنجومەن وەزیران داناگەی، و خاسەوکردن ئابووری ودارایی و وەڕیەوبردنی هەڵگرێد وپلانە ستڕاتیژیرگان ئەرا نواگردن سەختیەیل وەردەم وڵاتەگە.
وەگورەی بەیاننامەگە، کازمی، گووشتەکان ئه‌را پێشنارەیل و رای ئەندامەیل دەسە پەڕلەمانیەگە، و بۆچون دەسەگە دەربارەی چارەسەریە وەردەخریایەگان، و گیچەڵەگان لە نوای هەوڵداین هەڵایسان ئابووری عراق، وچالاكکردن کەرتەیل جوارجور.
سەرۆک وەزیران دووپاتکرد لەبان گرنگی ئەوەگ لە قۆناغ ئیسە هاوکاری زیاتر بوود له ناوبەین دەسڵات جیوەجیکار ودەسڵات یاسا داناین، ک بوودە خزمەتیگ ئەرا هاووڵاتەی، ودابین بەرژەوەنی گشتی وڵاتەگە ورەدکردن قوناغ سەختیەگان وەردەمی. هه‌میش جەخت خوەی دیاری کرد لە ئه‌نجامداین چەوپیکەفتنەیل وەردەوام وەگەرد دەسەیل پەڕلەمانی و پەڕلەمانتارەیل، چوونکە ئی پەیوەندیە وەخاسی تیەێدەو لەبان رەوش عراق.
کازمی وت: حکومەتەگەی قاقەز چەرمگیگ ئامادە کردگە ئەرا خاسەوکردنە چەوەڕیکریایەگە، و تەمەیل سەرەتایی بردگە، ک باس لەلی کریەێد وەرجە وەرێخستنی، و گرنگی یەک تەواوکردن حکومەت و ئەنجومەن نوێنەران، ئەرا پشتگیری ئی خاسەوکردنە خسته هویر.
وئاماژەدا ئەرا خراو وەڕیەوبردن ، وجەخت گشتی لەبان داهات نەفت ک رەسانەمانە ئی رەوشە ک ئیسە دوینیمنەی، وتەقەلا ئەرا خاسەوکردنی دەیمن ، لە ری کارکردن لەبان گورجەوکردن کەرتەیل کشتوکاڵی و پیشەسازی و گەشتی و وەبەرهەمهاوردن ئەرا فره‌کردن داهاتەیل وڵاتەگە.
