په‌رله‌مان عراق باس له بودجه‌يگ به‌تاڵ له پله‌يل وه‌زيفى ئه‌كا
شه‌فه‌ق نيوز/ ليژنه‌ى دارايى نوێنه‌رايه‌تى جه‌خت له‌وه كرد بودجه‌ى ئمساڵ 2020 ته‌قه‌شفى ئه‌دێ و به‌تاڵه له پله‌يل وه‌زيفى وه بوونه‌ى قه‌يران دارايى.
له‌ى باوه‌ته‌و، حه‌نين قه‌دۆ ئه‌ندام ليژنه‌گه له باسيگ ئه‌را شه‌فه‌ق نيوز وت: ئه‌وله‌ويات بودجه‌ى 2020 دقه‌ت له‌بان ده‌سه‌وه‌ركردن مووچه‌ى كارمه‌نده‌يل و خانه‌نشينه‌يل و ته‌مويلكردن كارت خوه‌راك و خه‌رجه‌يل بنه‌ڕه‌تى ئه‌كاو ئاماژه وه‌يه‌يش كرد پيشنياره‌يليش ئه‌را داوه‌زانن ده‌رماڵه‌ى پله‌يل تايبه‌ت وه ريژه‌ى 75 له‌سه‌ده.
جى باسه، قه‌دۆ پيشبينى ئه‌وه‌يش كرد بودجه‌ى 2020 وه‌رجه جه‌ژن ره‌مه‌زان له‌لايه‌ن حكومه‌ته‌و ره‌وانه‌ى په‌رله‌مان بكريه‌ێدو باس له‌وه‌يش كرد مسته‌فا كازمى سه‌رۆك وه‌زيره‌يل ده‌س ئه‌كاده دامه‌زرانن ليژنه‌يگ له شاره‌زايه‌يل ئابووريناس و ئه‌ندامه‌يل ليژنه‌ى دارايى ئه‌را راسه‌وكردن خاڵه‌يل بودجه وه‌و جووره‌گ ك بگونجيه‌ى وه‌ل بارودوخ ئيسه‌ى وڵاته‌گه.
