چەوی وە ئازادی نەکەفت.. گەنجیگ عراقی لە ژیر شکەنجە لەناو زیندانیگ لە بەغدا گیانی لەدەسدەێد
شەفەق نيوز/ سەرچەوەیگ ئەمنی لە پارێزگای ئەنبار، ئمڕوو شەممە، خەوەردا کە زیندانییگ نزیک بوی لە مەرقەزبوین وە بڕیار وەخشین گشتی، لە ژیر شکەنجە لەناو زیندانیگ لە بەغدا گیانی لەدەسدا.
هاوڵاتی حەیدەر سعود عەلياوی، لەداڵگبوی ساڵ 1984، خەڵک شار رەمادی، یەک دوو کوڕ و دویەتیگە، دویای ئەوە کە وە توومەت دزیکردن لە زیندان فڕوکەخانەی بەغداد بوی لە ساڵ 2016، هەرچەن دویای ئەوە بڕیار وەخشین گشتی گردەوەی، گیانی لەدەسدا.
سەرچەوەگە ئەرا ئاژانس شەفەق نیوز وت: حەیدەر نۆ ساڵ لە سزاگەی لە زیندان وەسەربرد، و رووژ پەنجشەممەی گوزەشتە ئاگادار کەسوکاری کریا کە ئەوەسا شەوەکی رووژ جمعە ئەرا رەمادی بریەید تا دادکاریی دووارەو بکەن، وتیش؛ وەلێ خیزانەگەی لە کەسیگ کە وەگەردی زیندان بویە، چاو مردنی ژنەفتن، کە ئەرایان وتیە: حەیدەر لەژیر شکەنجە شەفەق رووژ جمعە گیانی لەدەسدا.
وتیش: خیزانەگە روی وەرەو بەغداد کرد تا تەرمەگەی لە پزشک دادوەری بوەێد، مە نووڕن شوین شکەنجەی دیاریگ لەقەی لاشەیەو بویە، و هەناێ لە مدوو مردنی پرسین، کەسیگ وەڵام ئاشکرایگ وەپییان نەیا، و وەپییان وتن دویای مانگیگ ترەک سەردان فەرمانگەگە بکەن.
لەلای خوەییش، پەیامنێر ئاژانس شەفەق نیوز وت: خیزانەگە داوا لە لایەنەیل پەیوەندیدار کردن لێکۆڵینەوەی زویوەزوی واز بکەن ئەرا رەسین وە بندروس مردنی، و ئاشکراکردن ئەو لایەنەیلە کە وەرپرسن لەلی، دووپاتیش کردن کە ئی رویداوە پرسیارەیل فرەیگ دەرخەێد لەبان شیوەیل بەندیکردن و رەفتارکردن وەرد حەیدەر لەناو زیندان.
