پەیوەندییەیل عراقی خەوەر دەێد لە هەماهەنگی وەگەرد هەرێم کوردستان ئەرا خستنەکار موڵەت چوارەم و 5G هاوەخت

شەفەق نیوز - بەغداد

مستەفا جەبار سەنەد،  وەزیر پەیوەندییەیل عراق، ئمڕوو شەممە، ئاشکرا کرد لەباوەت سەردانیگ چەوەڕیکریاگ کە ئەنجامی دەێد ئەرا هەرێم کوردستان ئەرا باسکردن لە دۆسیەیل هاوبەش کە تایبەتن وە کەرت پەیوەندییەیل، وباس قەیران دابینکردن مووچەی فەرمانبەرەیل و چارەسەرە حکومییەیل خریایە رو کرد.

 سەنەد لە لێدوانیگ ئەرا شمارەیگ لە میدیایەیل راگەیانن، لەناویانیش پەیامنێر ئاژانس شەفەق نیوز، وت: "لە وەخت وەرگردن ئەرکەیل وەزارەتەگەو مکیسیگ وەرگردم ئەرا سەردان هەرێم کوردستان، و ئیمە رکداریمن لەبان ئەنجامداین ئی سەردانە لە زۊترین وەخت"، و دەسنشان ئەرا ئەوە کرد کە "بڕیگ کێشەی هەڵوەسریاگ هەس کە کار لەبان چارەسەرکردنیان کریەێد، و لە سەریانەو دۆسیەی کێبڵ ترانزێت کە لەڕی هەرێمەو رەد بوود".

هەمیش وت کە "وەزارەت پەیوەندییەیل فیدراڵی و وەزارەت گواستنەوە و پەیوەندییەیل لە هەرێم کوردستان نوێنەرایەتی یەک رووکار کەن لەوەرانوەر کۆمەڵگەی ناودەوڵەتی و کۆمپانیا جەهانییەیل"، و دیاری کرد کە "لە سەردانەگە باس لە خستنەکار موڵەت چوارەم ئەرا توڕەیل مۆبایل و خزمەتگوزارییەیل نەوەی پەنجەم (5G) وە شیوەیگ هاوبەش و هاوەخت ناوەین بەغداد و هەولێر کریەێد".

 لەباوەت دۆسیەی دارایی و دابینکردن مووچەیل، سەنەد دووپات کرد: "هەڵوێستم جیگیرە چ پەرلەمانتار بۊم یا وەزیر؛ کێشەیگ وەرین لە مووچەیل هەس لە ئەنجام بەسنەۊن داهاتە نەفتییەیل ئەرا داپووشانیان، و کارەگە ئاڵووزتر بۊ دۊای رۊداوەیل بەسانن تەنگەی هورمز"، و لە خود وەخت دیاری کرد کە "حکومەت خاوەن پلانەیل دارایی شەرعی و یاساییە کە نیەونە مدوو هەڵاوسان یا زەرەدرەسانن وە رەوش دارایی وڵاتەگە".

 وەزیر پەیوەندییەیل وە قسەیگ کووتایی هاورد کە "سەرۆک ئەنجومەن وەزیرەیل عەلی فالح زەیدی دۊکە جمعە رێنمایی دا وە دابینکردن مووچەی فەرمانبەرەیل وە تەواوی و جیوەجیکردن رێکارە هەوەجەدارەیل ئەرا دڵنیاییکردن لە وەردەوامبۊن خەرجکردنی".