وە مدوو فشارەیل پەککەفتن فڕۆکەخانەی مووسڵ.. ئەنجومەن نەینەوا روی کەێدە دەنگدان لەبان دروسکردن فڕۆکەخانەیگ نوو لە "سەحاجی"
شەفەق نیوز - نەینەوا
ئەندام ئەنجومەن پارێزگای نەینەوا، ئەحمەد عەبد رەببە، ئمڕوو شەممە، ئاشکرا کرد لە رویکردن ئەنجومەنەگە ئەرا یەکلاییکردن دۆسیەی دروسکردن فڕۆکەخانەیگ ناودەوڵەتی نوو ئەرا پارێزگاگە، و لە خود وەخت دڵسەردی خوەی نیشان دا لە توانای وەگەڕخستن فڕۆکەخانەی مووسڵ کە ئیسە هەس لە وەختیگ نزیک وە مدوو فشارەیلیگ کە ئاستەنگ خەنە وەر دەسوەپیکردن گەشتەیلی.
عەبد رەببە ئەرا ئاژانس شەفەق نیوز وت، کە ئەنجومەن پارێزگای نەینەوا وە نیازە لە ماوەی دانیشتن بانانی پرۆژەی فڕۆکەخانەی "سەحاجی" بارێدە دەنگدان، وە ئامانج ناچارکردن دەسەی بەرهەمهاوردن نەینەوا ئەرا وازکردن ری لە وەرانوەر کۆمپانیا ناودەوڵەتییە رەسەن و تایبەتمەندەیل بەس لە دروسکردن و وەڕیەوبردن فڕۆکەخانە ناودەوڵەتییەیل، وە دیاریکردن ئەوەگ سەرقاڵبۊن شمارەیگ لە ئەندامەیل و چگنیان لە دانیشتن وەرین ریگر بۊ لە یەکلاییکردن بڕیارەگە لە وەخت خوەی.
ئەندام ئەنجومەنەگە باس لە رەوش فڕۆکەخانەی ئیسەی مووسڵیش کرد، و دڵسەردی خوەی نیشان دا لە وازکردن و وەگەڕخستن راسیەگەی لە ماوەیگ نزیک وەرد ئەوەگ وەرجە چەن مانگیگ وە فەرمی وازکردنی راگەیانریاۊد؛ وە مدوو بۊین لایەنەیل نادیاریگ کە فشار خەنە بان هەردوج حکوومەت فیدڕاڵی و ناوخۆیی ئەرا ریگریکردن لە کەفتنەڕی گەشتە ئاسمانییەیل ئەرا ناوی و لە ناویەو.
عەبد رەببە دووپات کرد کە رویکردن ئەرا وژاردەی وەبەرهێنانی فڕۆکەخانەی سەحاجی بۊسە هەوەجەیگ وەپەلە ئەرا وسانن پەککەفتن هاتوچو ئاسمانی لە نەینەوا، و کووتاییهاوردن وە چەرمەسەری وەردەوام هاووڵاتییەیل کە ناچار بوون مەینەت و خەرج گەشتکردن لەڕی هەردوگ فڕۆکەخانەی هەولێر و بەغدا بکیشن ئەرا هاتوچو لە دەیشت و ناوخۆی وڵات.
پەرلەمانتار لەبان پارێزگای نەینەوا عەبدولمونعیم سەنجەری، لە ئەیلول/سێپتەمبەر گوزەشتە، داوا لە سەرۆک حکوومەت عەلی فالح زەیدی کردۊ دەسوەردان بکەێد ئەرا دەسوەبەرکردن وەگەڕخستن فڕۆکەخانەی ناودەوڵەتی مووسڵ، و ئاشکراکردن مدووەیل دواکەفتن وازکردنی.
سەنجەری، لە کۆنگرەیگ رووژنامەوانی کە لە پەرلەمان سازیا و ئاژانس شەفەق نیوز ئامادەی بۊ وت: بیزاری قورس خوەمان نیشان دەیمن لە وەردەوامی دواکەفتن وەگەڕخستن فڕۆکەخانەی ناودەوڵەتی مووسڵ وەرد هاتن و چگن 4 حکوومەت.
لە وەختیگ دەسەڵات فڕۆکەوانی مەدەنی عراقی دووپات لە وەردەوامی وەدویاچگن پرۆژەی فڕۆکەخانەی ناودەوڵەتی مووسڵ کرد لەڕی سەرکیشییە مەیدانییە دەورییەیل کە تیمەیل تەکنیکی و تایبەتمەنەگەی ئەنجامی دەن، بیجگە لە هەماهەنگی و پەیوەندی وەردەوام وەرد ئیدارەی پارێزگای نەینەوا و لایەنە پەیوەندیدارەیل؛ ئەرا تەواوکردن هەوەجەیل وازکردن و وەگەڕخستن فڕۆکەخانەگە وەپەی پێوەرە نیشتمانی و ناودەوڵەتییە پەسەنکریاگەیل.
دەسەڵاتەگە دیاری کە "وازنەکردن فڕۆکەخانەگە تا ئیسە گلەو خوەێد ئەرا شمارەیگ لە هەوەجە سەرەکییەیل کە هێمان تەواو نەکریانە".
