وە سەرۆکایەتی شاندیگ ئابووری.. سەرۆک بانک ناوەندی ئیرانی سەردان عراق کەێد

شەفەق نیوز - تاران / بەغداد

چەوەڕی کریەێد سەرۆک بانک ناوەندی ئیرانی عەبدولناسر هیمەتی، وە سەرۆکایەتی شاندیگ ئابووری باڵا، لە وەختیگ دۊاتر لەئیوارەی ئمڕوو یەکشەممە، بڕەسێدە بەغداد پایتەخت لە سەردانیگ فەرمی، وەپای ئەوەگ سەرچەوەیگ لە باڵیۆزخانەی ئیرانی لە عراق ئەرا ئاژانس شەفەق نیوز خەوەر دا.

لە لای خوەییشەو ئاژانس "ئیرنا"ی ئیرانی فەرمی، دیاری کرد کە سەردانەگەی هیمەتی ئەرا عراق ئامانج لەلی ئەنجامداین دانوسەنینە وەگەرد وەرپرسەیل لە هەردوگ بوار ئابووری و بانکی لە عراق.

دیاری کرد کە هەردوگ لایەن تەقەلا دەن ئەرا دانان میکانیزمەیل نوویگ ئەرا هامشوو بازرگانی هاوبەش لە چوارچیوەی رێککەفتن واژووکریاگ لەناوەین هەردوگ بانکە ناوەندییەگە لە هەردوگ وڵاتەگە.