وە پاسەوانی سەختیگ لەلایەن هاوپەیمان ناودەوڵەتی.. زیاتر لە 200 خیزان لە کامپ هۆل وەرەو عراق تیەن
شەفەق نيوز/ 223 خیزان عراقی، ئمڕوو شەممە، لە کامپ هۆل لە پارێزگای حەسەمەی سی وریا دەرچگن، و وەرەو عراق هاتنە، لەژیر ریکارەیل ئەمنی یەهایم لەلایەن هیزەیل هاوپەیمان ناودەوڵەتی.
شوکری حەجی وەڕیەوبەر نویسینگەی دەرچگن لە کامپ هۆل ئەرا ئاژانس شەفەق نیوز وت: ئی کاروانە 11هەمین چینە لە سەرتای ئمساڵ 2025 و کاروان 26ەس لە کاروانەیل گلەوداین عراقیەیل وەرەو وڵات خوەیان، و ئی کاروانە 223 خیزان وە 832 کەس هاناوی.
وتیش: لەی ساڵە کار ئەرا دەرکردن خیزانەیل عراقی لەوانەگ ئارەزوو گلەوخواردن کیێت وەڕیەو چوود، وە هەماهەنگی ناوەین ئیدارەی سەروەخوەیی لە باکوور خوەرهەڵات سوریا و حکومەت عراق.
زیاتر لە 20 پاس عراقی لە دەیشت کامپ هۆل گردەو بوین، تا ئەو خیزانەیل عراقیە بارن کە لە کامپ هۆل دەرچگن.
قەڵغانەیل ئەمریکی وەگەرد فڕین کۆپتەر ئەمریکی لەناو ریکارەیل ئەمنی وەلایەن هاوپەیمان ناودەوڵەتی بوی، ئەرا رەسین بیوەییگ تا ناو عراق.
لە ناوڕاس مانگ نيسان گوزەشتە 241 خیزان وە 865 تاکە کەسەو لە کامپ هۆل دەرچگن وەرەو ناو زەویەیل عراق هاتن.
وەرژەیەیش، وەزارەت کووچ و کەوچبەری ئەرا ئاژانس شەفەق نیوز ئاشکرا کرد کە شمارەی ئەو کەسەیلە کە لە کامپ هۆل سوریا ئەرا عراق هاتنە رەسیە 15 هەزار کەس.
عەباس جەهانگیر قسەکەر وەزارەتەگە ئەرا ئاژانس شەفەق نیوز وت: بڕ ئەو کەسەیل عراقیە کە لە کامپ هۆل سوریا وەرەو کامپ جەدعە لە نەینەوا هاوریانە رەسیە زیاتر لە 15 هەزار کەس، فرەیان ژن و مناڵە، و عیمران زیاتر لە 12 هەزار و600 کەس لە کامپەگە چەوەڕی هاوردنیان کات ئەرا عراق.
