کوشیان دوو داعشی یەکیگیان سەرکردەیگ ناودیارە سەربازەیل عراقی کوشتیە.. وینە
شەفەق نیوز/ سەرچەوەیگ ئەمنی، ئمڕوو چوارشەممە، خەوەردا کە فرۆکەیل جەنگی عراقی، گورزیگ ئاسمانی جیوەجی کردن، مەفرەزەیگ ریخریاگ داعش ناوەین ناحیەی رەشاد و قەزای داقوق لە پارێزگای کەرکوک کردە ئامانج.
سەرچەوەگە ئەرا ئاژانس شەفەق نیوز وت: فەرماندەیی فیرقەی پیادەی 11، لە وەشوینکەفتن مەیدانی، مەفرەزەیگ داعش لە دووڵ زغەیتون نزیک ئاوای کوبە پەیا کرد، و زانیاری دادە وەڕیەوبەرایەتی هەواڵگری سەربازی.
وتیش: فرۆکەیل جەنگی سەروە چەک ئاسمانی عراقی، گورزیگ ئاسمانی جیوەجی کرد، ئەو مەفرەزە وەپی کردە ئامانج، وتیش: هیزیگ لە فەوج کۆماندۆ فیرقەی 11 و کەتیبەی روانگەکردن توەنستن بچنە ناو دووڵەگە، وە شوین گورزەگە، هەرچەن ئەو ناوچەیلە سەختە و پڕە لە ئاو.
سەرچەوەگە وتیش: هیزەگە دوو تەرم پەیا کرد، یەکەمەگە هن تیرۆرست ناسیاگ وە "حەجی عەواد" بوی، کە سەرکردەی ئەو مەفرەزە بویە کە وەرجە چەن مانگیگ هیزەیل سوپای عراق کردە ئامانج، و بویە هوکار کوشیان چوار سەرباز لە دووڵ زغەیتون.
دویەکە سێشەممە، فەرماندەیی ئۆپراسیۆنەیل هاوبەش، راگەیان کە فرۆکەیل F_16 گورزیگ لە دووڵ زغەیتون لە کەرت ئۆپراسیۆنەیل کەرکوک وەبان میوانخانەیگ ریخریاگ داعش جیوەجی کردن.
