وزە و بەرهەمهاوردن کەنە ئامانج.. زەیدی روی وەرەو فەرەنسا و ئەڵمانیا کەێد لە سەردانیگ فەرمی
شەفەق نیوز - بەغداد
قسەکەر فەرمی وەناو حکومەت عراقی حەیدەر عەبودی، ئمڕوو یەکشەممە، راگەیان کە شاندیگ حکومەتی وە سەرۆکایەتی سەرۆک وەزیرەیل عەلی زەیدی پایتەخت بەغداد وەجیهیشت وە سەردانیگ فەرمی کە کۆمار فەرەنسا و کۆمار ئەڵمانیای فیدراڵی لەخوەی گرێد.
و عەبودی لە لێدوانیگ رووژنامەوانی وێنەگیریاگ لەباوەت سەردانەگە وت، کە زەیدی ئی گەشت ئەوروپییە لە پاریسەو دەس وەپی کەێد، کە قسەوباسەیل هاوبەش وەگەرد سەرۆک فەرەنسی ئیمانوێل ماکرۆن کەێد کە باس ئاسوویەیل پەیوەندییە دووانیەیل لەناوەین هەردوگ وڵاتەگە، و ریەیل گەشەپیدانیان ئەرا ئاستەیل پیشکەفتگ کەن.
دیاری کرد کە سەردانەگە واژووکردن بڕیگ لە لەیەکفامستنەیل لە بوارەیل بەرهەمهاوردن و وزە و پیشەسازی و بازرگانی و تەکنەلۆجیا و فێرکردن و روشنهویری و ژیرخانەیل وەخوەی دوینێد.
عەبودی هەمیش وت: "لە پاریسەو ئەرا بەرلین، سەرۆک وەزیرەیل چوود ئەرا فراوانکردن هاوبەشییە ستراتیژییەیل عراق و ئاڵشتکردن پەیوەندییە ناودەوڵەتییەیلی ئەرا بەرژەوەنییەیل و دەرفەتەیل و هاوبەشییەیل کاریگەر کە ئابووری و گەشەپیدان قایم کەن".
نویسینگەی راگەیانن ئەرا سەرۆک وەزیرەیل عراقی عەلی فالح زەیدی، ئیوارەی دۊکە جمعە، راگەیان کە دۊای ئمڕوو یەکشەممە، 13 ئەیلول/ سێپتەمبەر ئیسە، دەس وەپی کەێد وە سەردانیگ فەرمی وەرەو فەرەنسا، وە مکیسیگ لە سەرۆک ئیمانوێل ماکرۆنەو.
و نویسینگەگە لە بەیاننامەیگ کە رەسیە ئاژانس شەفەق نیوز دیاری کرد کە ئی سەردانە لە چوارچیوەی قایمکردن پەیوەندییە دووانیەیل لەناوەین عراق و فەرەنسا تیەێد، و باسکردن ریەیل فراوانکردن هاوبەشییەیل لە بوار و کەرتەیل جیاجیا، لە سەرەتایان وزە و ئاسایش.
وەپای بەیاننامەگە، زەیدی، دووشەممەی ئایەندە، 14 ئەیلول/ سێپتەمبەر ئیسە، چەوی کەفێدە سەرۆک فەرەنسی ماکرۆن، و باس شمارەیگ لە دۆسیە و پرسە هەرێمی و ناودەوڵەتییەیل کەن کە جی گرنگی هاوبەشن.
هەردوگ لایەنەگە سەرۆکایەتی دانیشتن قسەوباسەیل فراوانەگە کەن کە هەردوگ شاند عراقی و فەرەنسی جیوەجیی کەن، ئەرا دانان بنەمایەیل ئەرا بەسانن هاوبەشییە نووەیل لەناوەین بەغداد و پاریس، و باسکردن چوارچیوە گشتییەیل ئەرا هاوکاری دووانی لە بوارەیل ئابووری، و ئاسایش، و وزە، و فێرکردن، وەو شیوە کە بەشداری کەێد لە رۊوەڕۊبۊن ئاڵەنگارییە هەرێمی و ناودەوڵەتییە جیاجیایەیل، هەمیش چەودیاری رێوڕەسم واژووکردن لەبان شمارەیگ لە یاداشتەیل لەیەکفامستن لە چەن کەرتیگ کەن، وەپای بەیاننامەگە.
لە وەختیگ وەرین لە ئمڕوو، سەرچەوەیگ ئاگادار ئەرا ئاژانس شەفەق نیوز ئاشکرا کرد، لەباوەت نیەت سەرۆک وەزیرەیل عراقی عەلی زەیدی ئەرا چگن وەرەو ویلایەتە یەکگرتگەیل ئەرا بەشداریکردن لە کارەیل کۆمەڵەی گشتی نەتەوە یەکگرتگەیل، دۊای تەواوبۊن گەشتە ئەوروپییەگەی کە فەرەنسا و ئەڵمانیا لەخوەی گرێد، لە وەختیگ باس بویین تەقەلایەیل ئەرا ریکخستن چەوپیکەفتنیگ لەناوەینی و لەناوەین سەرۆک ئەمریکی دۆناڵد ترەمپ.
زەیدی لە ناوڕاس مانگ تەموز/ یۆلیۆی گوزەشتە سەردان ویلایەتە یەکگرتگەیل کردۊد، لە سەرۆکایەتی شاندیگ باڵا کە شمارەیگ لە وەزیرەیل و وەرپرسەیل حکومەتی و پەرلەمانتارەیل لە پاڵ پیاوەیل کار لەخوەی گرت، لە سەردانیگ فەرمی کە پەنج رووژ کیشا.
سەردانەگە دووپات کرد لەبان دەسوەپیکردن هاوبەشییگ ئابووری گشتگیر و جیاجیا ئەرا پشتگیریکردن ئابووری عراقی، و فراوانکردن دەرفەتەیل بەرهەمهاوردن، و چالاککردن بازاڕ کار ناوخوەیی، لە پاڵ تۊاناکردن عراق لە وازکردن دەروازەیل نوویگ ئەرا هەناردەکردن نەفت خاو و بەرزەوکردن توانایەیل بەرهەمهاوردن و پاڵاوتن.
