"گەورەترین بڕە قەورسان لە عراق" .. نەینەوا "چاڵ خەسفە" واز کەێد ئەرا ئاشکراکردن قوربانیەیل داعش (وینە)
شەفەق نیوز/ عەبدولقادر دخیل پارێزگار نەینەوا، ئمڕوو چوارشەممە، دەسەوکاربوین لە دووارە وازکردن "چاڵ خەسفە" راگەیان کە هەزاران قوربانی هاناوی کە ریخریاگ داعش کوشتەیان، و دووپاتیش کرد کە پارێزگاگە خەرج گشت پڕۆژەگە هەڵگرێد.
دخیل لە کۆنگرەیگ رووژنامەوانی وە ئامادەبوین ئاژانس شەفەق نیوز وت: لە شوین چال خەسفە باشوور موسڵ دەسەوکاربوین لە دووارە وازکردن قەورسانەگە راگەینیمن، کە گەورەترین بڕ قەورسانە لە عراق و شایەت لە جەهانیش، دویای تیرۆرکردن هەزاران مەدەنی لە مەوقەی داگیرکردن شارەگە وەلایەن ریخریاگ داعش.
دیاری کرد کە راپۆرتەیل سەرتایی نشان دەن کە داعش رووژانە نزیکەی دوو هەزار کەس لەناو ئی چاڵە کوشتیە، کە پاسەیل پڕ لە قوربانی هاوردیاد تا لە یەک شەین تیرۆریان بکەێد.
دخیل وتیش: وە هەماهەنگی وەرد دادگای نەینەوا، چەوڕیکردن خیزانەیل لەلی زیاتر نەپووڕیاس، ئەراوە بایەسە وەگورەی وەرپرسایەتی بویمن ئەرا دادپەروەری ئەو خیزانەیلە، و پەیاکردن وەڵام لەبان چارەنویس دووسەیلیان.
پارێزگار نەینەوا دووپات کرد کە ئی چاڵە گەورەترین بڕ قەورسانە لە عراق، و شایەت لە جەهانیش، و ئەوەسا بەرنامەیگ تایبەت ئەرا ریخریاگەیل ناودەوڵەتی و دەسەی شەهیدان پیشکەش کریەێد، ئەرا دابینکردن شایستەیل ئەرا وازکردن پاڵەگە، وتیش؛ پارێزگای نەینەوا ئەو خەرجە هەڵکرێد، چوینکە لە دەزگای شەهیدان بودجەیگ نییە کە بەشی بکەێد.
وتیش: پلان تەواویگ ئەرا ئی پڕۆژە دیریمن، ئمڕوو کار لە وازکردن چاڵەگە کەیمن، وەگەرد بڕە قەورسانەیلیگ ترەک لە تەلەعفەر و شنگال، وتیش: هاتێ ئی کارە ساڵیگ وەپی بچووک لە وەشکین و ناسین قوربانیەیلر وەلێ گرنگە لە ئمڕووەو دەسەوکارەو بویمن، و نەخشەی رییگ روون ئەرا جیوەجیکردن ئی کارە کیشیاس مە گرنگی گەورەیل لەلای دەسەڵاتەیل ناوخوەیی و ناودەوڵەتی دیرێد.
لە کۆتایی وتیش: ئی پڕۆژە گامیگ بنەڕەتیە ئەرا زانستن چارەنویس هەزاران قوربانی وەدەس داعش، و ئەوەسا وەگەرد گشت لایەنەیل رەنج دەێد ئەرا دابینکردن گشت توانایەیل تەواوکردن ئی پڕۆژەی گرنگە لە نزیکترین وەخت.
ئەو چاڵە کە وە چاڵ خەسفە ناسیاس، چاڵیگ جیۆلۆجیە کە نزیکەی 20 کیلۆمەتر لە باشوور موسڵ درویژەو بوود، و یەکیگە لە گەورەترین ئەو بڕە قەورسانەیلە کە داعش وەکاری هاورد ئەرا سەرنقومکردن تەرم قوربانیەیل مەوقەی داگیرکردن موسڵ لە حوزەیران 2014 تا تەمووز 2017.
شمارەی ئەو کەسەیلە کە داعش کوشتەیان و خستەیانە ناو چاڵەگە وە نزیکەی 3 هەزار کەس مەزەنە کریەێد، و کەسەیلیگ باس دوو یا سێ گلە چەن ئی شمارە کەن.
