چوار عراقی لەناو زەخمدارەیل تەقینەوەی ئیستەنبول
شەفەق نیوز/ کونسوڵخانەی عراق لە ئیستەنبول، ئمڕوو دووشەممە، زەخمداری چوار عراقی لە ئەنجام ئەو تەقینەوە راگەیان ک دویەکە جادەی تەقسیم کردە ئامانج.
کونسوڵخانەی لە بەیاننامەیگ وت: وە گرنگی گەورەیگ چەودیاری رویداو تەقینەوەی تیرۆری لە ناوچەی تەقسیم کەێد، دیاری کرد ک قونسوڵ گشتی وەکوتپڕ دویای رویداوەگە کەفتە جویلەکردن وەرەو لایەنەیل پەیوەندیدار تورکیا ئەرا زانستن شمارەی قوربانیەیل لە عراقیەیل.
بەیاننامەگە وتیش: شمارەیل زەخمدارە عراقیەیل لە تەقینەوەگە رەسیە چوار کەس، سیانیان زەخمیان سووک بویە، و لە خەسەخانە دەرچگن.
وتیش: زەخمدار چوارەمیش ئیرنگە کەفتیەسە نەشتەرگەری ک زەخمەگەی کەفتیەسە سویە، و دووپات کرد ک قونسوڵخانەی وەگەرد ئیدارەی خەسەخانەی ششلی کۆلون چەودیاری رەوش تەندروسیی کەێد.
شەوەکی ئمڕوو دووشەممە، سولەیمان سۆیلۆ وەزیر ناوخوەی تورکیا، دەسگیرکردن ئەو کابرا راگەیان ک بومبیگ وەجی هیشتیە، و بویە هوکار تەقینەوەیگ خوینین لە جادەی ئیستقلال لە ئیستەنبول، دویەکە یەکشەممە.
