"هەڵمەتیگ ژینگەیی".. بانک ناوەندی عراق وە 500 ملیۆن دینار سپۆنسەر کارخانەیل خشت کەێد
شەفەق نیوز/ بانک ناوەندی عراق، ئمڕوو یەکشەممە، دەسکردە هەڵمەتیگ ژینگەیی ئەرا کارخانەیل خشت.
راگەیانن بانکەگە لە بەیاننامەیگ رەسیە ئاژانس شەفەق نیوز وت: لە سای رینمایەیل جیهانی، و گونجیان وەرد سیاسەت بانکەیل ناوەندی لە کەمەوکردن تەکانەیل کاربۆنی، و پاڵپشتیکردن وەردەوامی ژینگەیی، بانک ناوەندی عراق راگەینێد کە بوودە خاوەن چارەسەرەیلیگ ئەرا وزەی پاک وە هەماهەنگی وەرد وەزارەت ژینگە، دەسمیەتی لە وەجیهاوردن ئەوزەڵکردن وەردەوام کەێد.
بەیاننامەگە وتیش؛ بانک ناوەندی عراق راگەینێد کە قەرز ئاسان ئەرا وزەی نووەوبوی کارخانەیل خشت گرێدەو، ئەرا ئاڵشتبوین لە وەکارهاوردن سزمەنی پیسکەر (نەفت سیا) ئەرا سزمەنیبگ چاکتر (گاز شل) ئەرا سنووردارکردن پیسبوین وا، کە ئاست قەرزەگە تا (500) ملیۆن دينار ئەرا هەر کارخانەیگ بەرزەو بوی، لەڕی بانکەیل عراقی مووڵەتدار.
بەیاننامەگە دیاری کرد کە بڕیار بانک ناوەندی پشتگیری سەندوق مقیەتیکردن و خاسەوکردن ژینگە کەێد وە بڕ یەک ملیار دینار ئەرا نواگیریکردن پیسبوین وا و ئاڵشتبوین ژینگەیی لە ئەنجام ئەوە.
بەیاننامەگە وتیش: ئی بڕیارەیلە لە وەڵامدان پەڵپەیل ئەوزەڵکردن ئابووری سەوز تیەێد و کەمەوکردن کاریگەری ژینگەیی ئەرا پیشەسازی و پشتگیریکردن ئاڵشتبوین پلەیی وەرەو ئابوورییگ وەردەوامتر.
کارخانەیل خشت لە بەغداد، وەتایبەت لە ناوچەیل نەهرەوان و مەدائین، لە دیارترین سەرچەوەیل پیسبوین وا لە پایتەخت دانریەن، کە ئی کارخانەیلە نەفت سیا سزنن، کە بڕەیل کەورەیگ لە دووانەی ئۆکسید کاربۆن و چشتەیلیگ پیسکەر ئەرا وا تەکان دەن، و لەناو ئاو و لەبان زەوی و دار و درەختەیل بنەو گرن، کە پیسبوین ژینگەیی رخداریگ دروس کەن.
