هشکەوبوین دەریاچەی حەمرین و دەرفەت خاسەوکردن ریەگە
شەفەق نیوز/ هاتێ ئی هشکەوبوینە ک دەریاچەی حەمرین وەخوەی دۊنێد، بوودە دەرفەتیگ ئەرا تەواوکردن ریەگە، ک یە چەن جاریگە دروس کریەێد و رمیەێد، ک ئەوە ری کوڵبڕیگە ئەرا هاتن و چگن ماشینەیل، لە خانەقین وەرەو خوار.
هەر ساڵیگ لەی وەرزە ک وەرەو تاوسان چوود، هشکی دەێد لە دەریاچەی حەمرین لە پارێزگای دیالە، ک لە ناحیەی سەعدیە وەرەو شارەبان بەسێد، و ئاوەگەی کەمەو بوود، و بوودە نیمچە چەمیگ ک تەنیا وەژێر پیەڵەگە رەد بوود، باوجی ئمساڵ وەرجە وەخت خوەی، ئاوەگەی دەریاچەی حەمرین وەتەواوی هشکەو بوی.
ئەو جادە و پیەڵە ک وەبان دەریاچەی حەمرین رەد بوود، بویەسە گیچەڵیگ ئەرا مەردم و رانندەیل، و هەمیش خوەی گیچەڵ کۆنیگە ئەرا حکومەتەیل پشتاوپشت، ک هەر ماوەیگ جاریگ ریەگە وە شیوەیگ وەختانە خاسەو کەن، تا لە وەرزەیل زمسان بکەفێدە وەر تەکان ئاوەگە، و بەشەیلیگ لەو ریە بڕمنێد، و بەشەیلیگ لەژیر ئاو دەریاچەگە نقوم بوود.
لەی ماوەی دویاییە، دووارە حکومەت دیالە کەفتە فتراق خاسەوکردن ریەگە، و ئی هشکەوبوینە وەدەرفتیگ ئەرا ئەنجامداینی وەکار هاورد، وەلی نیەزانیمن تا چەنیگ نوای تەکان ئاوەگەی لە زمسان گرێد.
