نەفت عراقی لە ئاستەیل خوەی لەبان 80 دۆلار مینێد وەگەرد داوەزین کەمیگ

شەفەق نیوز - بەغداد

نرخەیل هەردوگ خاو بەسرەی قورس و مامناوەند وە شیوەیگ کەم داوەزین، ئمڕوو چوارشەممە، هەرچەن ئەو بازداینە کە نرخەیل نەفت جەهانی و هەرێمی توماری کردن.

وەپای داتایەیل جەهانی ئەرا نەفت، نرخ خاو بەسرەی قورس وە بڕ 9 سەنت داوەزی تا بڕەسێدە 80.34 دۆلار ئەرا هەر بەرمیلیگ، وە داوەزین وە ریژەی 0.11%، لە وەختیگ خاو بەسرەی مامناوەند وە هەمان بڕ داوەزی تا بڕەسێدە 83.64 دۆلار ئەرا هەر بەرمیلیگ، هەمیش و وە ریژەی 0.11%.

لە ئاست جەهانی، خاو برێنت وە بڕ 81 سەنت بەرزەو بۊ تا بڕەسێدە 95.46 دۆلار ئەرا هەر بەرمیلیگ، وە زیایبۊن وە ریژەی 0.86%، لە وەختیگ خاو خوەرئاوای تەکساس ناوەندی ئەمریکی وە بڕ 49 سەنت ئەرا 90.71 دۆلار ئەرا هەر بەرمیلیگ بەرزەو بۊ، وە بەرزەوبۊن وە ریژەی 0.54%.

لە ئاست خاوە هەرێمییەیل، خاو موربان ئیماراتی بەرزەوبۊنیگ گەورا تومار کرد کە رەسیە 7.70 دۆلار تا بڕەسێدە 106.15 دۆلار ئەرا هەر بەرمیلیگ، وە زیایبۊن وە ریژەی 7.82%، لە وەختیگ خاو عومان لە بۆرسەی دوبەی ئەرا وزە ئەرا 94.31 دۆلار بەرزەو بۊ، وە زیایبۊن 3.88 دۆلار یا 4.29%.

هەمیش سەوەتەی ئۆپێک ئەرا 91.98 دۆلار ئەرا هەر بەرمیلیگ بەرزەو بۊ، وە زیایبۊن بڕ 2.39 دۆلار و وە ریژەی 2.67%، لە وەختیگ نرخ کوەیتی هەناردەکاری رەسیە 89.65 دۆلار، وە بەرزەوبۊن 2.21 دۆلار و وە ریژەی 2.53%.