نەجەف.. پەکخستن دەوام فەرمی ئەرا زیاتر لە یەک هەفتە وەبوونەی چلەی ئیمام حسێن

شەفەق نيوز- نەجەف 

ئەنجومەن پارێزگای نەجەف، ئمڕوو سێشەممە، پەکخستن دەوام لە پارێزگاگە راگەیان، لە رووژ پەنجشەممەی ئایندەو و ئەرا زیاتر لە یەک هەفتە، وەگەرد زیارەت چلەی ئیمام حسێن.

ئەنجومەنەگە لە بەیاننامەیگ رەسیە ئاژانس شەفەق نیوز وت: بڕیار پەکخستن دەوام فەرمی لە سوو پەنجشەممەی 7 ئابەو تا رووژ پەنجشەممە 14ی مانگ دریا، بیجگە فەرمانگە ئەمنی و خزمەتگوزارییەیل.

وتیش: بڕیارەگە لەناو دانیشن ئمڕوو ئەنجومەن پارێزگاگە هات کە وە سەرۆکایەتی حسێن عیساوی سەرۆک ئەنجومەن وەڕیەو چگ.

 عیساوی دیاری کرد کە پەکخستن دەوام فەرمی لە پارێزگاگە، ئەرا ریداین وە خەڵک پارێزگاگە هات تا بەشداری لە زیارەت چلەی ئیمام حسێن بکەن، و لە و دەسمیەتی بیەن لە پیشکەشکردن خزمەت ئەرا ئەو زیارەتکەرە بەڕێزەیلە کە سەردان نەجەف کەن.