ناڕەزایەتی لە بەسرە و کەرکووک و ئەنبار.. داواکارییەیل دارایی و فەرمانبەری کاریگەری لە کەرت وزە تیارن (وینە)

شەفەق نیوز- بەسرە/ کەرکووک/ ئەنبار

سێ پارێزگای عراقی، رووژ سێشەممە، ناڕەزایەتی و گردەوبۊنەیل داواکاری گریەدار وە کەرت وزە وەخوەیان دین، کە رەتکردن زیایبۊن نرخەیل نەفت خاو دابینکریاگ ئەرا پاڵاوگەیل لە بەسرە گردە خوەی، و ناڕەزایەتی لەبان نرخ ئەمپێر ئەرا موەلیدەیل ئەهلی لە ئەنبار، بیجگە لە داواکارییەیل ئەرا گلەوداین 610 کراکار ئەرا کار لە پاڵاوگەی کەرکووک.

لە بەسرە، خوەپیشاندان و گردەوبۊنەیل ناڕەزایەتی لەناو پاڵاوگەی شعەیبە نووەو بۊن چۊ دەربڕینیگ لە رەتکردن یەکجاری ئەرا بڕیار دۊایی حکومەت لەباوەت زیایکردن نرخەیل نەفت خاو دابینکریاگ ئەرا پاڵاوگەیل بەرهەمکاری و حکومی.

ناڕەزایەیل داوا لە لایەنە پەیوەندیدارەیل کردن دەسوەجێ لەی بڕیارە واز بارن، و هوشداری دان لە شوینەوارە نەرێنییەیلی لەبان خەرج کارکردن پاڵاوگەگە، و کاریگەرییە راسەوخوەگەی لەبان جیگیری کار کارمەنەیل و کەمەوبۊن قازانج کۆمپانیایەیل سەروە کەرت نەفت، وەپای پەیامنێر ئاژانس شەفەق نیوز.

لەلای خوەیانەو، خاوەن موەلیدەیل ئەهلی لە پارێزگای ئەنبار گردەوبۊنیگ ناڕەزایەتی لە وەرانوەر بینای ئەنجومەن پارێزگاگە رێک خستن، وە مدوو ناڕەزایەتی لەبان داوەزین نرخ ئەمپێر وە وەراورد وەرد خەرج وەکارخستن، و دووپات کردن کە نرخ پەسەنکریاگ وەگەرد قەوارەی ئەو خەرجییەیلە کە هەڵی گرن گونجیاگ نییە.

عەلا سادق خەڵەف، خاوەن موەلیدەیگ ئەهلی، لە گردەوبۊنەگە، ئەرا ئاژانس شەفەق نیوز وت، کە موەلیدەگەی لە مانگ ئاب نزیکەی 280 سەعات کار کردگە، لە وەختیگ خاوەن موەلیدەیل، وەپای قسەی خوەی، 35 دینار ئەرا هەر ئەمپێریگ دەس خستنە، و وتیش کە گرفتە سەرەکییەگە گریەدارە وە نرخ سەعات کارکردنەگە.

خەڵەف زیاتر وت، کە دەسەیگ سەردان خاوەن موەلیدەیل کردگە و وەپای هەژمارکردن خوەیان، خەرج سەعات کارکردن بی هەژمارکردن ریژەی قازانج وە نزیکەی 42 دینار دیاری کردگە، لە وەختیگ ئەرایان وە نرخەیلیگ ناوەین 26 و 33 و 37 دینار هەژمار کریەێد، وە ئەوە زانست کە ئی نرخەیلە وەگەرد خەرج راسگانی وەکارخستن گونجیاگ نین.

دیاری کرد کە خاوەن موەلیدەیل بارەیل زیاتر هەڵگرن کە ئەرا دابینکردن سزەمەنی و کرێکارەیل و کەرەستەیل کارکردن، و دیاری کرد کە بەشیگ لەی خەرجەیلە لە پۊل تایبەت خوەیان دەن، بیجگە باسەیل لەباوەت دابینکردن بەشیگ لە کەرەستەیل یا خزمەتگوزارییەیل وە بیوەرانوەر.

خەڵەف دووپات کرد کە خاوەن موەلیدەیلیش "خوەیان هاووڵاتین"، و بارەیل دارایی گەورەیگ هەڵگرن، و داوا کرد وە پەسەنکردن نرخیگ کە خەرج راسگانی وەکارخستن بخەێدە وەر چەو، و خاوەن موەلیدەیل زیانەیل زیاتر لەژیر ناو پاراستن هاووڵاتی نەخەنە بان شانیان.

دیاری کرد کە وەردەوامبۊن کار وە نرخەیل ئیسە، لە دیدگەی خاوەن موەلیدەیلەو، خەێدەیانە وەرانوەر قەیرانیگ دارایی روی لە زیایبۊن، لە سای بەرزەوبۊن خەرج وەکارخستن و نەۊن ریژەی قازانج بەسیگ.

لەی چوارچیوە، خاوەن موەلیدەیل ئاشکرا کردن کە بەیاننامەی نویسینگەی سەرۆک وەزیرەیل لەباوەت دابینکردن سزەمەنی پاڵپشتیکریاگ ئەرا موەلیدەیل و کارکردنیان 20 سەعات لە رووژیگ گریەدارە6 وە مانگ ئەیلول، و دووپات کردن کە گردەوبۊن ناڕەزایەتییەگەی ئمڕوویان لەبان نرخ پەسەنکریاگ ئەرا مانگ ئاب تیەێد، و ناڕەزایەتی نییە لەبان رێنماییەیل مانگ ئەیلول.

لە کەرکووک، دەیان لە کراکارەیل لە پاڵاوگەی کەرکووک، گردەوبۊنیگ ناڕەزایەتی لە وەرانوەر دیوان پارێزگاگە رێک خستن، ئەرا داواکردن وەدادیان و چەوخشانن وە بڕیار کووتاییهاوردن وە راژەیلیان.

یەکیگ لە خوەینشاندەرەیل، کە ناوی محمد عەبدوڵڵا دەلییە، ئەرا ئاژانس شەفەق نیوز وت، کە "دەیان لە کراکارەیل پاڵاوگەی کەرکووک و سەروە کۆمپانیای پاڵاوگەیل باکوور لە بێجی، خوەینشاندانیگ لە وەرانوەر دیوان پارێزگای کەرکووک رێک خستن، ئەرا داواکردن مافەیلیان و رەسین وەدادیان".

دیاری کرد کە "شمارەی ئەو کراکارەیلە کە کارەیلیان کووتایی پی هاتگە رەسێدە 610 کەس، و لە کارکەرەیل پاڵاوگەی کەرکووکن، و ساڵانیگ لە راژە و کار پیشکەش کردنە"، و دیاری کرد کە "کووتاییهاوردن وە راژەیلیان مدوو زەرەد و نەهامەتی گەورەیگ ئەرايان بۊە، و وە ستەم و غەدریگ لە مافمان هەژماری کەیمن".

دەلی زیاتر وت کە "ناڕەزایەتیکەرەیل داوا لە لایەنە حکومییە پەیوەندیدارەیل کەن وە چەوخشانن وە رەوشیان، و کارکردن لەبان گلەوداینیان ئەرا کارەیل خوەیان یا پەیاکردن چارەسەریگ دادپەروەرانە ئەرا چارەسەرکردن دۆسیەگەیان"، وتیش "داواکارییە سەرەکییەگە خوەی لە خستنیان لەناو بودجەی ساڵ 2027 دۊنێد، وە جۊریگ کە مافەیلیان گلەو بخوەێد و کووتایی وە نەهامەتییە وەردەوامەیلیان بارێد".

دووپات کرد کە گردەوبۊن ناڕەزایەتییەگە "ئاشتیانەس، و ئامانج لەلی رەسانن دەنگ کراکارەیلە ئەرا حکومەت ناوخوەیی و لایەنە فیدراڵییە پەیوەندیدارەیل، و هاندانیانە لەبان دەسوەردان پەلە ئەرا وەدادیان و گووشداین ئەرا داواکارییەیلیان".

خوەینشاندەرەیل داوا لە حکومەت و وەزارەت نەفت و کۆمپانیای پاڵاوگەیل باکوور و لایەنە پەیوەندیدارەیل کردن وە "واکردن دۆسیەی کراکارە 610 کەسییەگە، و چەوخشانن لە ساڵەیل راژەیان و رەوش کووتاییهاوردن وە کارەیلیان، و دانان چارەسەریگ یاسایی و کارگێڕی کە مسۆگەر مافەیلیان بکەێد".