کەمەوبوین لافاوەیل ئیران وەرەو دیالە وەڕێژەی ٥٠٪
2021-02-09T11:14:55+00:00
شەفەق نیوز/ وەرپرسیگ حکومەتی لە پارێزگای دیالە، ئمڕوو سێشەممە، راگەیان کەمەوبوین لافاوەگان ک لە ئیران وەرەو خاک عراق تەکان دەن، لەماوەی ٧٢ ساعەت گوزەیشتە ئەرا ٥٠٪ ، و دووپات کرد ک هیچ زەردە یا گەرفتەیلیگ نەویە.
مازن ئەکرەم خوزاعی وەڕێۆبەر ناحیەی قەزانیە ئەرا ئاژانس شەفەق نیوز وت: ئەو لافاوەیلە ک لە ئیرانەو وەرەو ناحیەیل مەنەلی و قەزانیە تەکان دەن، ئەرا نیمە لە شەپۆلەیل مانگ و ساڵەیل گوزەیشتە ولە وەرزەیل وارانەگان کەمەوکردن، ک شایەت وەفەرمان لایەن ئیرانی و رەدکردن لافاوەگان وەرەو شوونەیلیگ تر بویە.
ودیاری کرد ک لافاوە ئیرانیەگان لە ٧ دووڵ سنووری لە قەزانیە و مەنەلی هاتنە ری، و نەڕەسینە ئاست پڕ بوین دووڵەگان، وەپێچەوانەی لافاوە وەرینەگان.
