یەکەمین وتار ئەرا زاوا لە کارەسات سویرەگەی حەمدانیە… ئیمە لەناوەو مردیمنە
لە یەکەم وتاری وت: مەزەنە نیەکەێد ئاگرەگە لەوەر ئاگربازی گولپە کردیە، وەلێ مەزەنە کریەێد لە ئەنجام شۆرتیگ کارەبایی بویە.
ئەو ئاگرە کە شەو سێشەمە، لە وەخت دیریگ، لەناو ئاهەنگ سوریگ بویە هوکار کوشیان زیاتر لە ١٠٠ کەس، و زەخمداری نزیکەی ١٥٠ کەس، لە ناوچەی قەرەقۆش مەسیحی لە قەزای حەمدانیە سەروە پارێزگای نەینەوا.
هەرلە ریڤان زاوا لە تەمەن ٢٧ ساڵان، و وەوەیەگە حەنین لەتەمەن ١٨ ساڵان، لە ئاگرەگە قورتار بوین، وەلێ فرە لە کەسوکارەیلیان لە رویداوەگە گیانیان لەدەس دان.
ریڤان لە چەوپیکەفتنیگ وەگەرد تووڕ سکای نیوز بەریتانی وت: ١٥ کەس لە بنەماڵەگەی لەدەسدا، وتیش؛ دەزویرانەگەی نیەتوەنێد قسە بکەێد، کە داڵگی و براگەی بوینە قوربانی، و باوگی زەخمەیلی سەختە.
ریڤان ئویشێدەیش؛ راسە ئیمە وە زنی نیشتیمنەسە نوادان، وەلێ لەناوەو مردیمنە.
وەگورەی وەزارەت ناوخوەیی عراق، شمارەی ئامادەبویل ناو ئەو هۆڵە کە وەگورەی مەرجەیل بیوەیی نەویە، نزیکەی ٩٠٠ کەس مەوقەی هیزگردن ئاگرەگە لەناوی بوینە.
راپۆرتەیل باس کەن کە ئاگرەگە نزیک ساعەت ١٠:٤٥ لەوەر ئاگربازی مەوقەی سەماکردن دوو سویرەگە هیز گردیە.
وەلێ ریڤان مەزەنە کەێد کە ئاگرەگە وەشیوەیگ لە قەواسەگە بڵویزە کردیە نەک لە ئەنجام ئاگربازی، و نیەزانم هاتێ وە شۆرتیگ کارەبایی بویە، باوجی هەر لە قەواسەگە دەسوەپی کرد، و هەناێ دەنگ قرچەقرچ ژنەفتم نووڕیمە قەواسەگە.
وتیش؛ ئیجا ئەو قەواسە کە گشتی وە نایلۆن دروس کریایە، وەزوی تاویاوە، و کارەگە تەنیا چەن چرکەیگ وەپی چگ.
ریڤان وتیش: مەوقەی سەماکردن، کارەبا بڕیا، و هەناێ کارەبا گلەو خوارد، ئاگریگ لە قەواسەگە بوی، ئمجا مەردم دەسکردنە قیژە و وایین.
ریڤان وتیش: دەس ژنەگەم گردم، و کیشامەی و چوینکە دڵنگ سویر لەوەری بویە جویلەکردنی ئاسان نەوی، و لە دەر ئاشخانەگە دراوردمەی و قولەیلی زەخمدار بوین.
ریڤان وتیش: تەنیا یەک ئاگرکپەوکەر لەناو هۆڵەگە بویە، ئەوەیش کار نیەکەێد.
وتیش: باوگ دەزویرانەگەی پرسیار کردیە کە ئایا ئی ئاگربازیە ئی ناوە نیەسزنێد، باوجی وتن ئاگربازیەگە کارەباییە و هویچیگ نیەسزنێد.
ریڤان وتیش؛ حەنین داڵگی و دووان لە مامەیلی، و دوو دویەت ئامووزای لەدەس دا، و باوگی هیمان زەخمدارە.
خوەییش میمگی لەدەس دا، و مامەی هەفت کەس لە خیزانەگەی لەدەسدا، و خوەشکەگەی وەگەرد شویەگەی زەخمدار بوین.
ئەو کارەساتە هیلێد زاوا و وەوی بویشن دی نیەتوەنیمن لە میلکان بمینیمن.
ریڤان وتیش؛ دی وەپیمان نیەکریەێد لەیرا بمینیمن، کە هەر جاریگ خوازیمن کەمیگ خوەشی بکەیمن، کەلەمەیگ کەفێد و گشتی ویران کەێد، خاسترە بچیمنە ری.
