مینەکردن گیرهاتگەیل ژیر رمیاگ مەزار ئاینی کەربەلا وە هوشداری وەڕیەو چوود
شەفەق نیوز/ سەرچەوەیگ لە وەرگری شارستانی، ئمڕوو یەکشەممە، باس وەڕیەوچگن کارەیل مینەکردن گیرهاتگەیل ژیر خوەڵ رمیانەگەی مەزار "قەتارەی ئیمام عەلی " لە کەربەلا کرد ک وە هوشداری وەڕیەو چوود، نەگ لە شوینیگتر بڕمیەێد.
سەرچەوەگە ئەرا ئاژانس شەفەق نیوز وت: تیمەیل وەرگری شارستانی هیمان لە کار رزگاردن ئەوانەگ لە ژیر رمیای تەپەگەی کەربەلا وەردەوامن، و مەزەنە کریەێد پەنج کەس هانە ژیر رمیایەگە، دویای ئەوەگ دویەکە سئ زاڕوو رزگار کریان.
هەمیش باس زەخمداری چوار کەس مەوقەی رویداوەگە، و رەسینە دریاکەفتنیان، وئیسە تەندروسییان خاسە.
وەڕێەوبەرایەتی وەرگری شارستانی لە بەیاننامیگ وت: تیمەیلمان وەردەوامن وە چاڵکەنین هویردیگ تا ئاسن کۆنکرێتەگە بووڕن، و پارچەیل کۆنکرێت لە شوین قەتارەی ئیمام عەلی لە کەربەلا هەڵگرن، وە هاوکاری تیمەیل مینەکردن ورزگارکردن بەغداد و تیمەیل بابل ودیوانیە و موسەنا.
بەیاننامەگە وتیش: دویەشەو تا شەوەکی کار کریاگە، و تیمەیل توەنستن ئۆکسجین و ئاو نووشین و خوەراک بڕەسننە ئەو کەسیلە ک لە ژیر خاکەگە گیر هاتنە، ک دویای ئەوەگ کونا لە پارچەیل کۆنکرێت دروس کردن و قسەیش وەردیان کردن تا دڵنیا بوون.
بەیاننامەگە دووپات کرد ک تیمەیل توەنستن دوو مناڵ درارن و تەندروسییان خاسە، وهیمان کار تا دراوردن گشت گیرهاتگەیل لە زیارەتچیەیل و کریکارەیل وەردەوامە.
زانیاریەیل نشان ئەوە دەن ک رمیانەگە لەوەر ئەوە بوێە ک پاڵپشتیە خوەڵێنەگەی قەی مەزارەگە تیر لە تەڕی بویە، ک هیشت خوەڵەگە بڕمیەێدە بان مەزارەگە، و بکەفێدە بان بڕیگ زیارەتچی.
