کۆمسیۆن هەڵبژاردن ٤ مەرج ئەرا هەڵبژاردن زوینە دیاری کەێد
![کۆمسیۆن هەڵبژاردن ٤ مەرج ئەرا هەڵبژاردن زوینە دیاری کەێد](https://media.shafaq.com/media/arcella/1596298664370.jpg)
شەفەق نیوز/ کۆمسیۆن باڵای سەروەخوە ئەرا هەڵبژاردن، ئمڕوو شەممە، ئامادەیبوینی ئەرا وەجیهاوردن هەڵبژاردن زوینە لە شەش حوزەیران ٢٠٢١ راگەیان ئەگەر ٤ مەرج دابین کریا. کۆمسیۆنەگە لە بەیاننامەیگ رەسیە ئاژانس شەفەق نیوز وت: کۆمسیۆنەگە ئامادەبوود ئەرا وەجیهاوردن هەڵبژاردنەگە لەو وەختە ک موستەفا کازمی سەرۆک وەزیران دیاریی کرد ئەگەر چوار مەرج دابین کریا: کۆمسیۆنەگە وەیجوورە مەرجەگان دیاری کرد: یەکەم: ئەنجومەن نوێنەران یاسای هەڵبژاردن وەزویترین وەخت دروس بکەێد، وبڵاوبوودە رۆژنامەی فەرمی، چوونکە خوەی چوارچیوەی یاساییە ئەرا هەڵبژاردن. دوویەم: ئەنجومەن نوێنەران یاسایگ جیگر مادەی ٣ لە فەرمان ٣٠ ئەرا ساڵ ٢٠٠٥ دانەێد، ئەرا تەواوکردن ژمارەی دادگای فیدڕاڵی ک خوەی تەنیا لایەنیگە دەسەڵات یاسایی ئەرا واژووکردن ئەنجام هەڵبژاردنەگە دیرێد. سێیەم: حکومەتەگە بوودجەی هەڵبژاردنەگە ک وەرجەیە کۆمسیۆنەگە داوای کردگە ئامادەبکەێد. و لەی باوەتە کۆمسیۆنەگە داوا لە سەرۆک حکومەت کەێد وەتەرخانکردن دانیشتن تایبەتیگ لە ئەنجومەن وەزیران ئەرا چارەسەرکردن ئەو گرفتەیلەگ ریگری لە کار کۆمسیۆنەگە کەن. چوارەم: کۆمسیۆنەگە بانگەواز ئەرا نەتەوە یەکگرتوەگان کەێد و ئەو رێکخراوە مەدەنیەگان ئەرا پێشکەشکردن دەسمیەتی هەڵبژاردن، و دابینکردن چەودیری ئەرا ئەنجام داین هەڵبژرادنیگ ئازاد، نوێنەرایەتی خواست راسی گەل عراق بکەێد. کۆمسیۆنەگە ئاماژەدا وە پابەندی تەواوەتی، دویای جیوەجیکردن ئەو خاڵەیلە، لە ئەنجامداین ئەرکە دەستوریەگانی وەگشت دڵسوزییگ، وپەیمان دەێمنە گەلەگەمان وەداناین دەنگەیلیان لە پلەی ئەمانەتی و رەوشتی، ئەرا جیوەجیکردن هەڵبژاردن وەپەیمانەی ئاشکراییگ ناسریاگ لە سیستمە دیموکڕاتیەگان.