ماڵئاوایکردن جەماوەری و فەرمی فراوانیگ ئەرا شاعر موەفەق محمد لە حلە.. وینە

شەفەق نيوز/ شار حلە، شەوەکی ئمڕوو جمعەر پرسە و ماڵئاواییکردن فەرمی و جەماوەری ئەرا تەرم شاعر عراقی گەورە موەفەق محمد وەخوەی دی، وەگەرد ئامادەبوین فراوانیگ لە کەسایەتیەیل هونەری و ئەدەبی.

پرسە و ماڵئاواییکردن لە وەردەم ماڵەگەی دەسوەپی کرد، کە تەرمەگەی وە پەرچەم عراقی پیچیا، لەناو خەفەت و خەمباری گەورەیگ کە تیکەڵ بوی وە ئەسر و شعر.

دویەکە پەنجشەممە، شاعر عراقی گەورەی موەفەق محمد، دویای قەیرانیگ تەندروسی، لە تەمەن 77 ساڵە دویاکووچی کرد.

 موەفەق محمد، لەداڵگبوی ساڵ 1948 لە شار حلە لە پارێزگای بابلە، و یەکیگە لە ناودیارترین شاعرەیل پارێزگاگە، و لە لە شەسەیل سەدەی گوزەشتەو دەسکردە نویسانن شعر لە رووژنامەیل عراقی.

یە نزیک یەک مانگە چگەسە خەسەخانە، لەوەر قەیرانیگ تەندروسی، تا دویەکە گیانی لەدەسدا.

یەکێتی گشتی ئەدیب و نویسەرەیل عراق، لە بەیاننامەیگ رەسیە ئاژانس شەفەق نیوز پرسەی شاعر موەفەق محمد کرد، کە لەناو دووپات کرد کە موەفەق محمد یەکیگە لە دێرینەیل لە نویسانن خەفەت عراقی لەناو شعرەیلی، کە باس وەسەرهاتەیل وڵات لە جەنگ و نەهامەتی کردن.