پۆلیس دیالە خوەیکوشتن دە کەس لە پارێزگاگە شمارەکەێد داوای چارەسەر کەێد
قسەکەر فەرماندەیی، عەقید هەیسەم شمری، وە ئاژانس شەفەق نیوز وت، "شمارەی حالەتەیل خوەیکوشتن لە سەرەتای ئمساڵ تا دویکە شەممە رەسیە ئرا 13 حالەت فرەیگیان لەوەر گیچەڵ دەروینی و کۆمەڵایەتین".
وتیش "دەزگا ئەمنیەیل لێکۆڵینەوە لە شمارەیگ لە حالەتەگان کردنە ئەرا رەسین وە هووکارەگەی پەیاکردن چارەسەر پێویست و سنوور دانان ئەرا حالەتەیل خوەیکوشتنوە هەماهەنگی وەرگەرد دەزگای پەیوەنیدار".
هەمیش وەڕێوەبەر نویسینگەی کۆمیسیۆن باڵای ماف مرۆڤ دیالە سەڵاح مەهدی دووپاتکرد، "بەرزەوبوین رێژەی خوەیکوشتن لە دیالە گلەوخوەد ئەرا پەستان دارایی و دەروینی و خێزانی و سۆزداری، وەرد ئاڵویدەبوین وە تووڕەیل کۆمەڵایەتی و کاریگەربوین بڕیگ لە قوربانیەیل وە ژیان خوەرئاوایی یا ئەو ژیان لوکسە کە بڕیگ لە ناودارەیل زندگی کەن و نەتوەنستن رەسین وەپی".
مەهدی ئەرا ئاژانس شەفەق نیوز دووپاتکرد، "کەمەوکردن حالەتەیل خوەیکوشتن لەناو گەنجەیل دیالە و عراق وە گشتی هەوەجە وە رێکار حکومی کەێد کە رێ چەودێریکردن تونیگ گەنجەیل ناو خێزان کرێد، هەمیش سوود لە وزەیان وەربگیرێد لە کار و پاڵنەریان بوون ئەرا وەرزشکردن و مسۆگەرکردن کار ئەرا بی کارەیل تا سنوور ئەرا بیکاری دابنرێد کە هووکار سەرەکی لە هووکارەیل بەرزەوبوین رێژەی خوەیکوشتن".
داواکەێد "پێویستە تەقەلایگ هاوبەش بوود لەناوەین حکومەت و دامودەزگایەیل ئاینی و کۆمەڵایەتی ئەرا سنووردارکردن دیاردەی خوەیکوشتن کە مەترسی گەپیگ دروسکەێد هەڕەشەس وەبان کۆمەڵگەی دیالە لە ئەنجام بەرزەوبوین رێژەگە وە شیوەی وەردەوام".
