کلکردن هێزەیل "پاراستن یاسا" ئەرا شوعلە لە بەغدا لە دویای پەککەفتن هەڵمەت لاوردن زیایچگنەیل و زەخمداربوین ئەندامەیل
شەفەق نیوز - بەغدا
شمارەیگ لە ئەندامەیل هێزە ئەمنییەیل، شەوەکی ئمڕوو چوارشەممە، زەخمدار بوین لە ئەنجام کەفتنە وەر کوچگەفڕی کردن وە لایەن مەردمەیل ناڕازی لەبان هەڵمەت لاوردن زیایچگنەیل نیشتەجیبوین لەبان زەوییەیل دەوڵەت لە ئاوایی "نور" سەر وە ناوچەی رەحمانییەی شوعلە لە بەغدای پایتەخت.
سەرچەوەیگ ئەمنی ئەرا ئاژانس شەفەق نیوز وت، "ناڕازییەیل ئاگر لە چەرخدان لەبان ئەو رێیەیلە کە وەرەو شوین زیایچگنەیل چگن ئەرا رێگریکردن لە وەرەو نوا چگن هێزە ئەمنییەیل و ئامێرەیل سەر وە ئەمیندارێتی بەغدا کە راسپریاگن وە لابورنەگە، و وە کوچگ پەلامار کارمەن و ئەندامەیل دان".
سەرچەوەگە وتیش، "وەزارەت ناوخوەی بڕیار دا هێزەیل پاراستن یاسا ئەرا ئاواییەگە کل بکەێد ئەرا چەسپانن کۆنتڕۆڵ لەبان رەوشەگە، لە دویای توومارکردن زەخمداربوین لە ناو کڕ ئەندامەیل راسپێریاگ وە ئەرکەگە".
جی باسە لە مانگ ئاب/ئۆگەست گوزەشتە، ئەفسەریگ وە پلەی عەمید و ئەندامیگ کوشیان، و چوار کەس تر زەخمدار بوین لە ئەنجام کەفتنە وەر تەقەکردن راستەوخۆی هێزیگ ئەمنی و مەفرەزەیل خزمەتگوزاری لە وەخت جیوەجیکردن ئەرک لاوردن زیایچگنەیل نیشتەجێبوین لە ناوچەی "کەڕارە" سەر وە گەڕەک دۆرە لە باشوور بەغدا.