لە دیالە.. حکومەت دەسدەێدە وەر تا مرافەی ناوبەین عەسائیب و ڕەوت سەدر کپەو بکەێد

شەفەق نیوز/ سەرچەوەیگ ئەمنی لە دیالە، ئمڕوو پەنجشەممە، ئاشکرای راسی ئەو مرافە کرد ک لەناوبەین کەسەیلیگ وەلایەن بزووتنەوەی عەسائیب ئەهل حەق و ڕەوت سەدر لە قەزای خاڵس قومیا.

سەرچەوەگە ئەرا ئاژانس شەفەق نیوز وت: مرافەیگ کەفتە ناوبەین دوو کەس یەکیگیان لایەنگر عەسائیب ئەهل حەق بوی و ئەوەکە لە ڕەوت سەدر، لە نزیک وەڕیەوبەرایەتی پەروەردەی خاڵس، رەسیە هەڕەشە و گردەوکردن کەسەیلیگ لە هەردوگ لایەنەگە، و نزیک بوی بڕەسێدە وەکارهاوردن چەک، ئەگەر دەسوەردان هیزەیل پولیس و لایەن حکومەتی نەویاد ک ئەو گیچەڵ و گرفتە کپەو کردن.

وتیش: وەڕیەوبەرایەتی پەروەردەی خاڵس فەرمانگەگە لە خانمە فەرمانبەرەیل چووڵ کرد نەگ چشتیگ روی بەێد، و دووپات کرد ک ئیسە رەوشەیل ئارامە و هاژیر کۆنترۆڵ.