"لەیدي تەكسي" یەکەم پڕۆژە لەی شیوە لە شاریگ عراقی (وێنە)
شەفەق نیوز/ هەرچەن سیمای ئاینی لە پارێزگای کەربەلا باوە، باوجی زنەیلە دەرفەت خاسیگ دیرن تا کاروبار خوەیان وەڕیەو بوەن، و پڕۆژەی "لەیدي تەكسي" یەکیگ لەلیانە و یەکەمە لەی شیوە.
کابتن مەلاک عنزی ئەرا ئاژانس شەفەق نیوز ئۊشێد: پڕۆژەگە جۊر هۊیریگ دەس وەپیکرد، باوجی قەبووڵیگ لەلای هەشت ژن تر لە پارێزگاگە پەیا بۊی، تا دۊیای چەن رووژیگ پڕۆژەگە بکەفێدە کار.
ئۊشێد: هەشت ژن تەمەنیان هالە ناو ٢٨ تا ٥٠ ساڵان، جۊر رانندەی تەکسی لەباو پارێزگاگە و لەدەشتیییش وەرەو قەزا و ناحیەیلە کار کەن، و قەبووڵکردن گەورەیگ لەلایەن خیزانەیل کەربەلا ئەرا تەکسی لەیدی وەخوە دی.
عنزی باس کەێد ک پڕۆژەگە پیشوازی گەورەیگ لەلایەن کۆمەڵەگای کەربەلا وەخوەی دی، و پەیامەیل رەنگین فرەیگ رەسیە پیمان ک هان کارمان دەێد و شیوەی رەفتار باڵای کەربەلایەیلە نشان دەێد، و باس بنچینەی رەسەنیان کەێد، و چەن مکیسیگ وەپیمان رەسی ک دڵ ئەرا ئەو قسەیل خوەشە ئارام گرێد، باوجی بەشیگ هەس یە قەبووڵ نەکرد ک ژنیگ تەکسی بڕانێد، و ئیچۊر کەسەیلیگ شایستەی ئی کۆمەڵگای ئیمە نیین.
راگەیانکار ماجد خەیات ئەرا ئاژانس شەفەق نیوز ئۊشێد: ئیجۊر کارەیلیگ دەسمیتمان دەن ک ژن بوودە خاوەن ئابووری، ک ئی کارەیلە لەلایەن یاسا و ئاین و کۆمەڵگا قەبوول کریانە، و یەیشە پڕۆژەی خاسیگە دەرفەت کار دەێدە ژن، و هەمیش مقەیەتی ژنەیلە لە چزدان بەشیگ لە رانندەیل تەکسی کەێد.
خەیات باس کەێد ک ئی پڕۆژە بەڵگەیگر لەبان گەشەکردن کۆمەڵگای کەربەلا لە رۊی ژن، و شیوەی شارستانی نشان دەێد.
هاووڵاتی ئەبو عەلی خەڵک قەزای هیندیە لە کەربەلا، لە قسەگەی ئەرا ئاژانس شەفەق نیوز باس خوەشهاڵی وەی پڕۆژە کرد ک هیلێد لەبان دۊیەت و ژنەیلمان لە چزدان وچشتەیلیگ تر دڵنیا بۊیمن.
و ئۊشێد: دۊیەتەگەم خوەنەوارە لە زانکۆی کەربەلا، ولەوەر دۊیری قەزای هیندیە لە شار کەربەلا نیگەران بۆیم، و ناچار بۊیام خوەم بڕەسنمەی و رووژانە لەبان کارەگەی خوەم دیر کەفن، باوجی ئی پڕۆژە بارمان سووکەو کرد، و داوا لە لایەنە پەیوەندیدارەیلە کرد پاڵپشتی ئیجۊر پڕۆژەیگ بکەن.
