لەدوو پارێزگا.. مردن ئەندامیگ ئەمنی وە هووکار نادیاریگ و خوەیکوشتن ژنیگ شەس ساڵان و دەسگیرکردن 6 دز
شەفەق نیوز/ سەرچەوەیگ ئەمنی، ئمڕوو دووشەمە، خەوەردا لە کوشیان ئەندامیگ ئەمنی وە هووکار نادیاریگ لەناو سەربازگەی ناو فرۆکەخانەی ناودەوڵەتی بەغدا، خوەیکوشتن ژنیگ شەست ساڵان لە زیقار، و هێزە ئەمنیەیل 6 دز دەسگیر کەن.
سەرچەوەگە وە ئاژانس شەفەق نیوز وت، "ئەندامیگ لە فەوج تەکتیکی کەربەلا لەوەخت خول راهێنانکردن وە بارودۆخ نادیاریگ مردیە لەناو مەکتەو تیپ جواوداین خێرا لە چوارچمگ فرۆکەخانەی ناودەوڵەتی بەغدا".
ویش: "تەرمەگە ئەرا پزیشک دادوەری کلکریاس ئەرا لێکۆڵینەوە و زانین هووکار مردنی".
لە زیقار سەرچەوەیگ ئەمنی وە ئاژانس شەفەق نیوز خەوەردا "ژنیگ شەست ساڵان گیان لەدەسدا لەری خوەیخسن وەناو چەم (ئەبو شەبیبە) لەناوچەی ئال سەگبان سەر وە قەزای غوراف باکوور شار ناسڕیە ناوەن پارێزگای زیقار".
وتیش "ئەو کەسە خوەی وەناو چەمەگە فرەدایە مێشکی تەواو نییە" وتیش "تەرمەگەی ئەرا پزیشک دادوەری کلکریاس تا رێکارەیل یاساییەیلی تەواوبکرێد".
لەلای ترەک سەرچەوەگە دیاریکرد "هێزە ئەمنیەیل توەنستنە لەری کوڵەی تونیگ شەش دز دەسگیربکەن لەناوچەی ئوم حجول، کە باندیگ پەس دزین دروسکردبوین لە شار ناسڕیە ناوەن پارێزگای زیقار" وتیش "دزەیل ماشینیگ بارهەڵگر لە جویر (کیا بنگۆ) وەپیان بویە شەش گامیش و چوار گا دزیاگ هەڵگردوین".
