له‌باره‌ى په‌لامارداين مه‌زارگه‌يل و ئاماده‌كارى ئه‌را"ولايه‌ت باكوور به‌غدا"وشدارى دريا
شه‌فه‌ق نيوز/ ئه‌نداميگ له‌بان پاريزگاى سه‌ڵاحه‌دين وشدارى دا له په‌لاماره‌يل ريكخرياگ داعش ك مه‌ترسيه‌يل فريه‌يگه‌و شايه‌ت مه‌زارگه‌يل ئايينى بگرێده ئامانج له سه‌ره‌تاى هوير و ڕايگ و له‌وه‌ر ئاماده‌كارى ئه‌را دامه‌زرانن "ولايه‌ت باكوور به‌غدا" تايبه‌ت وه ريكخريايه‌گه.
له‌ى باوه‌ته‌و، محه‌مه‌د كه‌ريم به‌لداوى ئه‌را شه‌فه‌ق نيوز وت: هووكار په‌لاماره‌يل مگێشيفه و به‌له‌د له وه‌رپرسيارێتى سه‌ركرده‌يل و وه‌زاره‌ته‌يل ئه‌منيه له‌وه‌ر خراوى ئداره‌كردن دوسيه‌ى ئه‌منى و پشتگووشخستن برووسكه‌يل ئه‌منى يه‌ك له‌شوون يه‌ك ك له‌تى وشدارى دريا له‌باره‌ى په‌لاماره‌يل تيرۆريستى وه‌رده‌وام له كه‌رته‌يل سه‌ڵاحه‌دين و ناوچه‌يل تر.
به‌لداوى باسيش له كرده‌وه‌يل سوودوه‌رگرتن له قه‌يران كۆرۆنا كرد ئه‌را مه‌هانه‌ى ئازادكردن فريه‌يگ له سه‌ركرده‌يل تيرۆر له زيندانه‌يل دوياى ئه‌وه‌گ شكه‌ست هاوردن له ئازدكردنيان وه ياسايه‌يل وه‌خشين له وه‌خته‌يل وه‌رين و له هه‌مان وه‌خت وشدارييش دا له په‌لاماره‌يليگ مه‌ترسيدار ك مه‌زارگه‌يل ئايينى له سامه‌ڕا و به‌له‌د و دوجێل بگرێده ئامانج له‌وه‌ر ئاماده‌كارى ئه‌را دامه‌زرانن "ولايه‌ت باكوور به‌غدا" و ئاماژه وه‌يه‌يش كرد ناچوه‌يل باشوور سه‌ڵاحه‌دين و باشوور كه‌ركوك مه‌فتنه‌سه وه‌ر چالاكيه‌يل تيرۆريستى له‌وه‌ختيگ ك سياسيه‌يل سه‌رقاڵ كار خوه‌يانن و ده‌زگاى هه‌واڵگيرى كپ و بيده‌نگه له‌لايه‌ن ده‌سڵاته‌يل ئه‌منييه‌و له به‌غدا.
