كوشيان کوڕیگ و زەخمداری باوگی لە ئەنجام تەقیان بومبیگ لە دیالە
2023-09-22T07:52:39+00:00
شەفەق نیوز/ سەرچەوەیگ ئەمنی لە دیالە، ئمڕوو جمعە، خەوەردا لە کوشیان کوڕیگ و زەخمداری باوگی وە تەقیان بومبیگ دانریاگ لە دەورگرد ناحیەی ئەبو سێدا باکوور خوەرھەڵات بەعقووبە.
سەرچەوەگە ئەرا ئاژانس شەفەق نیوز وت: کوڕەگە لە تەمەن ١٢ ساڵانە، کوشیایە و باوگی تویش زەخمداری سەختیگ هاتیە، ئەوەیش لەناو باخیان لە ئاوای ئەبو کرمە سەروە ناحیەی ئەبو سێدا باکوور خوەرھەڵات بەعقووبە.
ئەبو سێدا، ٣٠ کێلومەتر وەرەو باکوور خوەرھەڵات بەعقووبە، ناوچەیگ نائارامە، و یە چەن ساڵیگە رویداو ئەمنی و جەنگ هووزانە وەخوەی دوینێد، لەوەر زاڵبوین گرووپەیلیگ لەیاسادەرچگ و ململانێ مەزهەوی لە شوین ریخریاگ قاعیدە لە ساڵەیل گوزەشتە.
