كوشيان دوو ئەندام حەشد و دەسگیرکردن ١١ توومەتبار
شەفەق نیوز/ سەرچەوەیگ ئەمنی لە بەغداد، ئمڕوو پەنجشەممە، خەوەردا لە کوشیان دوو کەس و زەخمداری دوو کەس ترەک یەکیگیان ئەندامە لە حەشد شەعبی لە وەردەوەردەیگ، و وەردەوەردەیگ خیزانی بویە هوکار زەخمداری ئەندامیگ لە حەشد، و هیزەیل ئەمنی دە توومەتبار دەسگیر کردن، یەکیگیان بکوشە.
سەرچەوەگە ئەرا ئاژانس شەفەق نیوز وت: پۆستیگ لەبان سۆشیال میدیا بویە هوکار ناکۆکی ناوەین ئامووزایل لە ناوچەی حسێنیە باکوور بەغداد، رەسیە وەکارهاوردن چەک، یەکیگیان ئەندامە لە حەشد شەعبی، کە وەخت جەنگەگە لەورا رەد بویە.
وتیش: هیزیگ ئەمنی رەسیە شوین رویداوەگە و تەرمەگە ئەرا پزشک دادوەری برد، و زەخمدارەیل ئەرا خەسەخانە، و لێکۆڵینەوە لە رویداوەگە واز کرد.
سەرچەوەگە وتیش: دەمەقاڵیگ خیزانی ناوەین برایەیل هیشتیە دووانیان برای سێیەمیان بکوشن، کە ئەندامە لە حەشد شەعبی، لەناوچەی بەلەدیات خوەرهەڵات بەغداد.
وتیش: یەکیگ لە تاوانبارەیل دەسگیر کریا، و ئەوەکە وایە.
هەرلیوا، فەرماندەیی ئۆپراسیۆنەیل بەغداد لە بەیاننامەیگ رەسیە ئاژانس شەفەق نیوز وت: دە توومەتبار دەسگیر کریان، یەکیگیان توومەتبارە وە کوشتن، و یەکیگیش ریەیل گشتی و کەنار ریەیل وەکار تیەرێد ئەرا بردن پویل وەرانەور وسیان ماشینەیل، لەلای رەسافەی بەغداد.
دیاری کرد کە ئەرا تەواوکردن ئۆپراسیۆنەیل ئەمنی لە گشت ناوچەیل پایتەخت، وە ئامانج قایمکردن ئاسایش و ئارامی و مقیەتیکردن دەسکەفت ئەمنی، فیرقەی یەکەم لە بنەمای زانیاری هەواڵگری هویردیگ، دەسکردە ئەرکەیل مینەکردن و وەشکین و جیوەجیکردن یادداشتەیل دەسگیرکردن دادوەری، وە هەماهەنگی وەرد بەش هەواڵگری و ئاسایش فەرماندەییمان، کە رەسیە دەسگیرکردن دە توومەتبار وە توومەتەیل جیاجیا وەگورەی یاسا، لەناویان توومەتباریگ وە کوشتن لە ئەنجام دەمەقاڵیگ خیزانی، و لەناو ماڵەگەی دەسنریا وەبان چەک و عەتاد بیمووڵەت، و یەکیگیش ریەیل گشتی و کەنار ریەیل وەکار هاوردیە ئەرا وسیان ماشینەیل، ئەوەیش لە ناوچەی بەلەدیات، و کەمپ سارە، و خەناسە، و پارک سەعدون، و جادەی ئەبو نوئاس لەلای رەسافە.
دووپات کرد کە توومەتبارەیل وەگەرد چشتەیل نایاسایی دریانە دەس لایەنەیل پەیوەندیدار.
