كه‌ركوك شكايه‌ت ئه‌و ميوانيكه‌ره ئه‌كا له ميوانيه‌گه‌ى ده‌يان كه‌س تويش كۆرۆنا بوين
شه‌فه‌ق نيوز/ شانه‌ى قه‌يران له پاريزگاى كه‌ركوك، رينمايى دا فه‌رمانگه‌ى ته‌ندروستى پاريزگاگه له‌وه‌ر شكايه‌تكرن ئه‌و خاوه‌ن ميوانييه ك له‌رووژه‌يل جه‌ژن ره‌مه‌زان له گه‌ڕه‌ك غه‌رناته ميوانى مه‌ردم كرد و بويه هووكار تويشبوين زياتر له 30 حاڵه‌ت تويشبوين وه ڤايرۆس كۆرۆنا.
شانه‌ى قه‌يران له به‌ياننامه‌يگ ئه‌را ئاژانس شه‌فه‌ق نيوز يه‌يش ده‌رخست ك رينماييش داگه شكايه‌ت دژ ريكخه‌ر ئاهه‌نگ ماره‌بڕانيگيش تۆمار بكا له گه‌ڕه‌ك عه‌ره‌فه له شار كه‌ركوك.
شانه‌ى قه‌يران وت: خاوه‌ن ميوانيه‌گه‌و ريكخه‌ر ئاهه‌نگه سه‌رپيچى له رينمايه‌يل ليژنه‌ى سه‌ڵامه‌تى نيشتمانى و بڕياره‌يل شانه‌ى قه‌يران كردنه وه‌گووره‌ى ياساى ته‌ندروسى گشتى شماره 89 ساڵ 1981 و ياساى سزايه‌يل شماره 111 ساڵ 1969 ، ئه‌ويش له‌وه‌ر ئه‌وه‌گ هووكار بوينه له بڵاوبوينه‌وه‌ى په‌تاگه له كه‌ركوك.
