فیشەک پاکەوکردن گیان پۆلیسیگ سینێد و دوو زەخمدار لە دوو رویداو جیاجیا
شەفەق نیوز/ سەرچەوەیلیگ ئەمنی، ئمڕوو چوارشەممە، خەوەردا لە کوشیان ئەندامیگ لە پۆلیس ئیدارەی ناوچەی گەرمیان وە گولەیگ هەڵە لە تفەنگەگەی، ودوو کەسیش وە رویداویگ هاتوچو لەبان ری دووزخورماتوو – کەرکوک زەخمدار بوین.
سەرچەوەگە ئەرا ئاژانس شەفەق نیوز وت: ئەندامیگ لە پۆلیس گەرمیان لەداڵگبوی ١٩٨١ وەناو (شیا عوسمان محمد) وەگولەیگ گیانی لەدەسدا ک لەمەوقەی پاکەوکردن تفەنگەگەی لەناو ماڵەگەی لە گەڕەک شۆڕشگێڕیەیل لە قەزای کفری گولە لەلی دەرچگە.
سەرچەوەگە وتیش قوربانیەگە لە پشوو فەرمی بوی، و دویای رەساننی ئەرا خەسەخانە گیانی لەدەسدا، وتەرمەگەی ئەرا پزشک دادوەری کەلار کلکریا.
لەلاییگتر، سەرچەوەیگ ئەمنی لە سەڵاحەدین ئەرا ئاژانس شەفەق نیوز وت: دوو گەنج دویای پلیان ماشینیان لەبان ری خورماتوو- کەرکوک زەخمدار بوین.
سەرچەوەگە وتیش: دوو زەخمدارەگە بریانە خەسەخانەی دووز ئەرا چارەسەری، ودەسەڵاتەیل ئەمنی لێکۆڵینەوە لە رویداوەگە واز کردن.
